Kremlniñ kontroli altında olğan Qırım ukümeti, Keriç boğazındaki Tuzla belinde bulunğan topraq arsasını qomşu Rusiyeniñ mülkiyetine bermek istey. Munasip buyruqnıñ leyhası yarımadanıñ ukümeti saytında derc etildi.
Vesiqada: «Qırım Cumhuriyeti, Keriç, Tuzla beli adresi boyunca bulunğan, meydanlığı 6580 kvadrat metr ve izin berilgen qullanuv türü naqliyat olğan topraq arsasını Qırım mülkiyetinden federal mülkiyetke bedava alıp berilmesini kerçekleştirmek», – denile.
Qırımnıñ kütleviy haber vastalarınıñ bldirgenine köre, buyruq aprel 17-de Qırım ukümetiniñ oturışuvında baqılacaq.
2017 senesiniñ noyabrinde Keriç köprüniñ qurucıları Tuzla beli ve adasını bir-birine avtoyol aralıqları ile bağladılar.
Tuzla beli bir vaqıtları Taman yarımadasına tam olaraq qavuşa edi, lâkin keçken asırnıñ 1920-nci yıllarında ondan Tuzla adası ayırıldı.
2003 senesinden başlap, Ukraina ile Rusiye arasında, rusiyelilerniñ Taman yarımadası tarafından dambanı qurmaları sebebinden başlağan çatışma neticesinde Ukrainada Tuzla, rejimli zona sayıla edi.
Tuzla etrafındaki çatışma, Tuzla adasınıñ aitligine dair davalar ve Rusiye tarafından Keriç boğazında adağa doğru dambanıñ qurulması sebebinden başlanğan Ukraina ile Rusiye arasındaki munasebelterde bir buhran oldı. Bazı talilcilerniñ fikrine köre, dambanıñ qurulmasından maqsat, Keriç boğazı ve Azav deñiziniñ statusı meselesini çezmek içün Ukrainağa tazyiq etmek edi.
