Rusiyeniñ Rostov-na-Donu şeerindeki Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ baqılması esnasında qabaatlav şaatını diñledi. O, işniñ figurantları Muslim Aliyev ve Enver Bekirovğa musbet harakteristikalar berdi. Bunı Qırım.Aqiqatqa advokat Aleksey Ladin bildirdi.
Onıñ aytqanına köre, şaat, Aliyev ve Bekrovnıñ oña İslâmnı ögretkenlerini bildirdi ve bu, mezkür dinniñ ananeviy ceryanı edi, dep qayd etti.
Ladinniñ qayd etkenine köre, tahqiqat vaqtında şaat eki kere sorğulandı – ve ekinci sorğulama esnasında o, «Hizb ut-Tahrir»ni añdı, lâkin mahkemede şaat bu malümatnı seslendirmedi, ve qabaatlav tarafı cinaiy işte olğan malümat ile mahkemede berilgen ifadeler arasındaki zıddiyetke diqqat etmedi.
Ladinniñ malümatında köre, ondan soñ mahkeme qabaatlav tarafından taqdim etilgen iş materiallarnıñ ögrenilmesine keçti.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, Enver Bekirov ve Vadim Siruk yaqalandı. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqadar olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Yanvar 24-te Ukraina Tış işleri nazirligi Rusiyeden Yaltadaki «Hizb ut-Tahrir işi» figurantınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
