Halqara elektrik alâqa birligi (EAB) ilhaq etilgen Qırım territoriyasında Rusiyeniñ telefon kodları nomeralanmasını tanımay. Ukrainanıñ Devlet mahsus alâqa ve informatsiyanı qorçalav hizmetinde Rusiye memurları ve KHVleriniñ beyanatlarına böyle cevap berdiler.
Qırım.Aqiqatnıñ malümat talabına berilgen cevapta: «Sahte propagandanıñ kenişletilmesi, informatsion boşluqta hibrid tecavuzınıñ nevbetteki aktı edi… 2014 senesinde EAB Baş kâtibi beyanatta bulundı. Beynatında o… Ukrainanıñ, dünya tarafından tanılğan sıñırları içinde öz telekommunikatsiyalarnı regulirlemege mustaqil aqqı olğanını tasdiqladı. Aynı zamanda o, EABniñ BMT Baş Assambleyası tarafından qabul etilgen Qırım Muhtar Cumhuriyeti ve Aqyar statuslarınıñ er angi deñiştirilmelerini tanımama aqqında qararnıñ talaplarını köz ögünde tutmaq keregini qayd etti», – denile.
Ondan ğayrı matbuat hizmetinde, EABniñ 2017 senesi iyül 11 tarihlı operativ bülleteninde: «ülke kodu – 380, Qırım vilâyeti içün zonanıñ kodu – 65, Aqyar şeeri içün zonanıñ kodu – 69» şeklinde Ukrainanıñ Qırım ve Aqyar içün nomera resursı aqqında malümatnıñ neşir etilgenini hatırlattılar.
Ukraina muessisesinde: «Devlet mahsus alâqa hizmeti memuriyeti Ukraina Tış işleri nazirligi ile beraber Rusiyeniñ qanunsız areketlerini toqtatmaq içün munasip çareler köre», – dep ilâve ettiler.
Rusiye ilhaq etilgen Qırımda, halqara nomeralama sistemasına binaen qullanılğan, EAB ve Ukrainanıñ milliy nomeralama sisteması taraflarından tayin etilgen irişüv kodlarını bir taraflama şekilde lâğu etip, Rusiye içün pekitilgen kodlarğa deñiştirdi.
Mart ayında Rusiyeniñ Alâqa ve kütleviy kommunikatsiyalar nazirliginiñ başlığı Nikolay Nikiforov KHVlerge, sanki Halqara elektrik alâqa birligi Qırım ve Aqyar içün Rusiyeniñ telefon nomeralamasını tanıdı, dep bildirdi.
