Kremlniñ kontroli altında olğan Aqmescit rayon mahkemesi ekstremistik ifadelerde qabaatlanğan İsmail Ramazanovnıñ tevqifini mayıs 18-ge qadar uzattı.
Bunı aprel 16-da Qırım.Aqiqat muhbiri bildire.
Oturışuv esnasında tahqiqatçı Alisa Gluhova, iş boyunca ekspertizalarnıñ neticeleri keldi, bu sebepten uquqqoruyıcılarğa, qabaatlav neticesini azırlamaq ve materiallarnı prokuraturağa alıp bermek içün daa bir ay kerek, dep bildirdi.
Ondan ğayrı Gluhova, muhakeme etilgen şahıs qaçmaq ya da qanunğa qarşı olğan faaliyetinen oğraşmaqnı devam etmek mumkün, dep bildirdi.
Qırım.Aqiqat muhbiriniñ bildirgenine köre, Ramazanovnıñ advokatı Aleksey Ladin, işniñ tahqiq etilmesi esnasında «açıq bir surette uzatılğanı körüne, ve bu, tahqiqatçınıñ, sıñırlav tedbirini uzatmaq aqqında muracaatınıñ red etilmesi içün esas olmaq mumkün», dedi.
Ramazanov, özüni qabaatlı tanımağanını, bunı qanun vastasınen isbatlamağa azır olğanını ve Qırımdan qaçmağa azırlanmağanını ilâve etti.
Yanvar 23-te Novıy Mirde Rusiye telükesizlik hadimleri, qırımtatar İsmail Ramazanovğa ekstremizmniñ propagandasında qabaatlavnı bildirip, evini tinttiler. Daa soñra mahkeme yaqalanğannı tevqif etti.
Daa soñra Rusiyeniñ Qırım boyunca Tahqiqat komitetinde tahqiqatçılarnıñ, internet-radio vastasınen ekstremistik materiallarnı tarqatqanında qabaatlanğan Aqmescit rayonınıñ sakinine qarşı cinaiy iş açqanlarını bildirdiler.
İlhaqtan soñ Qırımnı asılında idare etken Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarğa qarşı, evlerinde kütleviy surette ötkerilgen tintilüvlerni qullana.
