Suriye ukümeti, bir qaç yıl türlü isyancı gruppirovkalarınıñ kontroli altında olğan Damask şeeriniñ civarı Şarqiy Gutanıñ tam bir kontrol altında alınğanını bildirdiler.
Suriye mudafaa naziriniñ bildirüvini Rusiye arbiyleri de tasdiqladı. «Ceyş-al-İslâm» silâlı gruppirovkasınıñ uruşmacıları ve aileleriniñ azaları Duma şeerini terk etti.
Rusiye mudafaa naziriniñ malümatına köre, 20 biñ qadar kişi avtobuslar ile Suriyeniñ şimalinde Türkiye arbiyleri tarafından kontrol etilgen territoriyalarğa alıp ketildi.
Aprel 7-de oldı dep iddia etilgen himiyeviy ucüm tamam Duma şeeriniñ zapt etilmesi esnasında yapılğan edi. Aprel 14-ke keçer gecesinde AQŞ, Britaniya ve Fransa tarafından Suriyedeki nişanlarğa endirilgen raketa darbeleri bu ucümge qarşılıq oldılar. Dumadaki isyancılar, ihtimallı himiyeviy ucümden soñ çoqqa barmadan şeerni terk etmege razı oldılar.
Ğarp devletleri Asadnıñ rejimini himiyeviy silânıñ qullanılmasında qabaatlaylar. Damask ve Moskva bunı inkâr eteler.
Yaqın vaqıtta Dumağa Himiyeviy silânıñ yasaq etilmesi boyunca teşkilât tarafından yollanılğan ekspertlerniñ kelecegi beklenile. Cumaertesi künü olar Damaskqa keldi.
