İlhaq etilgen Qırımda 50 qadar Ukraina Silâlı quvetleriniñ arbiy hadimi ailesi kvartiradan çıqarıldı. Bunı, «Gromadske radio» içün bergen intervyüde «Regional insan aqları merkezi»niñ adliyeci Vitaliy Nabuhotnıy bildirdi.
Adliyeciniñ aytqanına köre, bu, qomşu Rusiyeniñ prezidenti Vladimir Putin tarafından mart 22-de imzalanğan fermannıñ sayesinde imkânlı oldı.
Nabuhotnıy: «İşğal etilgen Qırımnıñ territoriyasında bayağı hizmet kvartiraları qaldı. İşğal başlağanda olar Ukraina arbiy hadimlerine ait edi. Arbiy hadimlerniñ ailelerini, mesken yerleri artıq hizmet qullanıluvından çıqıp, işğalci akimiyetke ait olğanı sebebinden yaşağan yerlerinden çıqaralar», – dep añlattı.
Adliyeci, arbiyler ve olarnıñ ailelerini küç ya da maneviy tazyiqni qullanıp çıqaralar, dedi. Regional insan aqları merkezi Ukraina Helsinki birligi ile beraber, bu insanlarnıñ İnsan aqları boyunca Avropa mahkemesine şikâyet bermelerine yardım etmege tırışa.
Ukraina Mudafaa nazirliginiñ malümatına köre, Qırım Rusiye tarafından ilhaq etilgen soñ Qırım arbiyleriniñ yalıñız üçte biri Ukrainanıñ qıtadaki qısmına çıqıp ketti. Bu, qararnen dört biñ arbiy hadim. Olarnıñ bir buçuğı – zabitler. İlhaqtan evel yarımadada 13 biñden ziyade Ukraina arbiy hadimi hizmet etti.
