Almaniyadaki «Almaniya içün alternativa» fırqasından deputatlarnıñ bir gruppası ilhaq etilgen Qırımda yarımadadaki Rusiye ukümeti tarafından teşkil etilgen «Yalta iqtisadiy forumu»na baracaq.
Bunı, «Almaniya içün alternativa»dan Bundestagnıñ deputatı Markus Fronmayer Almaniyadaki Welt neşirine bildirdi.
Siyasetçiniñ aytqanına köre, ziyaret ve aprel 19-21 künlerinde olacaq forumda iştirak «şahsiy» olacaq. Qırımnı ziyaret etecek gruppağa siyasetçilerden daa kim kirecek, şimdilik belli degil.
Sol fırqanıñ vekili, Bundestagnıñ deputatı Aleksandr Noy da forumda iştirak etmek içün davetname aldı, lâkin, Weltniñ bildirgenine köre, o, Qırımğa davetni red etti. Ondan ğayrı, Almaniya parlamentindeki Sollar fraktsiyasında, olarnıñ deputatları Yaltağa barmaycaqlar, dep bildirdiler.
Qayd etilgenine köre, daa evel forumnıñ teşkil eticileri matbuat relizi dağıtıp, içinde «50-den ziyade siyasetçi, iqtisadiyat ve vatandaş cemiyetiniñ vekilleri ve ekspertlerden ibaret Almaniya ve Avstriyadan eyetler»niñ tedbirde iştirak eteceklerini bildirdiler.
Rusiye ukümeti, ecnebiy vatandaşlarnı Qırım territoriyasına davet etip, onıñ işğalini qanuniyleştirmek istey.
Ukraina Tış işleri nazirliginde, ecnebiy siyasetçiler tarafından yapılğan Qırım ziyaretleriniñ resmiy statusqa malik olmağanlarını bildireler. Ukraina tış işleri muessisesi, keçken seneniñ iyülinde muracaat neşir etip, ecnebiy vatandaşlar ve vatandaşlığı olmağan şahıslarnı Qırımğa qanunsız barmaqtan saqındırdı.
