Yaltada Nikita nebatat bağçasınıñ kollektsiyasından çiçeklerniñ ananeviy sergisi açıldı. Kelgenlerde, sergi meydançığında nebatat bağçasınıñ kollektsiyasından türlü güllev seviyesinde olğan 73 biñ lâleni körmek imkânı bar edi.
Qırım.Aqiqat muhbiriniñ bildirgenine köre, keçken yıllardan farqlı olaraq, tedbirniñ bu senedeki tantanalı qısmı daa sade şekilde, muzıkalı temaşa olmadan keçti. Ananeviy olğan şeer ve qasaba rehberleriniñ selâmlav nutuqları da olmadı.
Bu yıl kiriş biletiniñ fiyatı 100 ruble (qararnen 41 hrivnanı – QA). Açılış kününde vatandaşlarnıñ imtiyazlı kategoriyaları ve molbertlernen kelgen ressamlar içün kiriş bedava edi.
Nebatat bağçasınıñ hadimleri ziyaretçiler içün floristik master-klassnı keçirdiler. Onda musafirlerni dekor etme qaideleri ve deste içün kesilgen çiçeklerniñ tazeligini saqlama usulları ile tanış ettiler.
Nikita nebatat bağçasındaki birinci «Lâleler paradı» 1999 senesinde olıp keçti.
