Telegramnıñ tesis eticisi Pavel Durov, Roskomnadzornıñ (Alâqa, informatsion tehnologiyalar ve kütleviy kommunikatsiyalar saasında nezaret boyunca federal hizmetniñ) talabı üzerine messencerniñ blok etilmesi neticelerini izalarken, gizlilik satılmay, insan aqları ise qorqu ve açközlük sebebinden telükege oğratılmamalı, dedi.
Durov: «Yerli ukümet organlarınıñ İT şirketleri üstündeki akimiyeti parağa esaslana. Ukümet, öz bazarlarından kelgen kelir ceryanlarını blok etecegi ile qorquzıp ve şirketlernı hucur işler yapmağa mecbur etip, er bir daqqada öz aktsiyalarnı harap etmek mumkün», – dep qayd etti.
Ondan ğayrı, messencerniñ tesis eticisi, «Telegram, blok etilmesine rağmen, qullanıcılarnı vaziyetniñ inkişaf etkeni aqqında haberdar etmek maqsadınen merkezleştirilgen şekilde mesajlar yollmaq imkânını saqlap qalacaq», dep qayd etti. O, messencerniñ, qullanıcılardan qoşumça areketler talap etmegen, içine quraştırılğan bloklarnı atlama usullarını qullanacağını ilâve etti.
Pavel Durov, VPNsiz hizmetke yüz faiz irişe bilinmesi kefalet etilmegen, dedi.
Aprel 13, cuma künü Moskvadaki mahkeme, Roszomnadzornıñ talabı üzerine Telegramnıñ deral blok etilmesine dair qarar aldı. Qorçalavnıñ vekilleri, messencer rehberleriniñ iç bir razılaşma ya da añlaşma yapmaycaqlarını ve mahkemeniñ qararına qarşı şikâyet berilecegini bildirdiler.
Keçken aftada Roskomnadzor tarafından Telegram içün tayin etilgen muddet soñuna yetti. Muessise, qullanıcılarnıñ mesajlarını şifreleme anahtarlarını FSBge bermekni talap etti. Telegramda bu talapnıñ yerine ketirilmesini red ettiler ve, ondan ğayrı, bunı tehnikiy ceetten yapmaq mumkün olmağanını bildirdiler.
