Radio Free Europe/Radio Liberty (RFE/RL) mediaşirketi Rusiyedeki prezident saylavı ve prezident kampaniyası aqqında balanslı ve doğru haberler taqdim ete edi. Bunı şirketniñ vekili Martins Zvaners, Rusiye Federatsiya Şurasınıñ azası Andrey Klimovnıñ, Rusiye prezidenti saylavı esnasına yer alğan çetel kütleviy haber vastalarınıñ qarışuvı aqqında iddialarını izalarken bildirdi.
«RFE/RL haber hizmetleri, bütün namzetler ve problemalarnıñ keniş surette aydınlatılmasını teklif etip, Rusiyedeki prezident saylavı ve kampaniyası aqqında balanslı ve adaletli haberni temin etti», – dedi Zvaners.
Bunıñ arfesinde komissiyanıñ reisi Andrey Klimov «RİA Novosti» agentligine, Azatlıq Radiosınıñ rus hizmeti ve onıñ Krım.Realiyi, Kavkaz.Realiyi, Sibir.Realiyi ve İdel.Realiyi leyhaları; «Golos Ameriki», «Nastoyaşçeye vremâ» telekanalı, Doutsche Welle, BBC ve IFR radiostantsiyası, ve bunıñ kibi de «Meduza» ve «Eho Kavkaza» radiostantsiyası Rusiyedeki prezident saylavına tesir etmege tırıştılar, dep bildirdi.
Mart 18-de Rusiye ukümeti ilhaq etilgen Qırımda Rusiye prezidenti saylavını keçirdi. Vladimir Putin altı yıllıq muddetke ğayrıdan saylandı.
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
Ukraina Yuqarı Radası mart 22-de ilhaq etilgen Qırım territoriyasında Rusiye prezidenti saylavınıñ tanılmaması aqqında qarar içün rey berdi. Munasip qarar içün kerek olğan 226 yerine 255 halq deputatı rey berdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
