Link açıqlığı

Saatnıñ esas haberi

Rusiye Federatsiya Şurası, prezident saylavına «tesir etmege tırışqan» kütleviy haber vastalarını bildirdi, Krım.Realiyi – olarnıñ arasında


Rusiye Federatsiya Şurasınıñ devlet suverenitetini qorçalav boyunca komissiyasında maruza azırlandı. Onda, vesiqanı azırlağanlarnıñ fikrine köre, mart ayında prezident saylavına tesir etmege tırışqan kütleviy haber vastaları bildirildi. Maruzağa binaen, Azatlıq Radiosınıñ Krım.Realiyi leyhası bu cedvelge kirdi.

Komissiyanıñ reisi Andrey Klimov «RİA Novosti» agentligine, Azatlıq Radiosınıñ rus hizmeti ve onıñ Krım.Realiyi, Kavkaz.Realiyi, Sibir.Realiyi ve İdel.Realiyi leyhaları; «Golos Ameriki», «Nastoyaşçeye vremâ» telekanalı, Doutsche Welle, BBC ve IFR radiostantsiyası, ve bunıñ kibi de «Meduza» ve «Eho Kavkaza» radiostantsiyası Rusiyedeki prezident saylavına tesir etmege tırıştılar, dep bildirdi.

«Bu KHVler «sükünet künü»nde teşviqat ve propagandağa yer berdi, ve bunıñ kibi de bütün prezident namzetleriniñ faaliyetini musaviy şekilde aks etüv printsipine riayet etmediler», – dedi Klimov.

Onıñ aytqanına köre, bu KHVlerge qarşı cinaiy, memuriy ve ondan ğayrı vatandaşlıq uquqı ile alâqalı tedbirler tayin etilmek mumkün.

Klimov: «Cinaiy ve Memuriy kodeksniñ işlemekte olğan normaları teşkilâtlarnı böyle bozuluvlar içün mesüliyetke çekmege imkân bereler», – dedi.

Rusiye ukümeti mart 18-de ilhaq etilgen Qırımda Rusiye prezidenti saylavını keçirdi. Vladimir Putin altı yıllıq muddetke ğayrıdan saylandı.

Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.

Ukraina Yuqarı Radası mart 22-de ilhaq etilgen Qırım territoriyasında Rusiye prezidenti saylavınıñ tanılmaması aqqında qarar içün rey berdi. Munasip qarar içün kerek olğan 226 yerine 255 halq deputatı rey berdi.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG