Zakarpattâ vilayeti devlet memuriyetiniñ reisi Gennadiy Moskal «marginal cail»dir. Bunı Azatlıq Radiosına Qırımtatar Milliy Meclisiniñ reisi, Ukraina halq deputatı Refat Çubarov bildirdi. Böyle etip o, «qırımtatarlar birlikte olğan olsa, Rusiye özüniñ «yeşil adamçıqlar»ınen beraber Qırımğa ucüm etmez edi» dep öz fikrini ifade etken Zakarpattâ başlığınıñ sözlerini izaladı.
Çubarov: «Belli bir saalarda professional olıp, diger saalarnıñ ekseriyetinde «marginal cail»den başqa bir şey olmağan insanlar bar», – dedi.
Onıñ aytqanına köre, «qırımtatarlar din alâmetine köre, ya da başqa bir alâmetke köre bölüngen edi, demek teşebbüsleri – sandıraqlavdan başqa bir şey degil».
«İstilânıñ birinci kününden kütleviy, açıq ve teşkil etilgen şekilde soqaqlar ve meydanlarğa çıqqan yekâne küç olğan qırımtatarlarğa aqlarını bermek kerek. Olarğa etnik ukrainler qoşuldı. Biz rusiyelilerge qarşı o mucadeleni berip, Moskal kibi biñlerce professionallar, sabıq militsiya, KGB ve SBU hadimleri Qırımğa yardım etecek, dep bekledik, lâkin bu olmadı», – dedi Çubarov.
Gennadiy Moskal şimdilik Refat Çubarovnıñ sözlerini izalamadı.
«Glavred» portalındaki çat esnasında Moskal, «bizler stabillikniñ kefaleti dep sayğanımız, birisi tarafından Qırımnıñ zapt etilmesine yol bermeycek olğan qırımtatarlarnıñ birligi, Rusiyeniñ mahsus hizmetleri tarafından bozulğan edi», dedi.
«Ve böyle etip Rusiyeniñ mahsus hizmetleri bir kereden «eki tavşannı urdı». Em Qırımnı tutıp aldılar, em de şimdi «Hizb ut-Tahrir» tarafdarlarını, terrorist teşkilâtınıñ tarafdarları sıfatında Qırımdan top-top alıp keteler. Albuki asılında ruslarnıñ Qırımnı zapt etüv planındaki «Troya ayğırı» rolüni tamam olar oynadı», – dep tüşüne memur.
1997-2000 seneleri arasındaki muddet içinde Moskal Qırımda Ukraina İçki işler nazirligi idaresiniñ rehberi edi, 2006-2007 seneleri arasında yarımadadaki Ukraina prezidentiniñ temsilcisi vazifesinde çalıştı.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
