Aqmescitte aprel 13-te mahkeme prokuror ile tahqiqatçınıñ kelmegeni sebebinden tahqiqatnıñ Timur Şaymardanovnıñ ğayıp olmasına dair areketleri aqqında iş boyunca oturışuvnı başqa künge keçirdi. Bunı Qırım.Aqiqat muhbiri bildire.
Muhbirniñ malümatına köre, oturışuv aprel 19, saat 10:00-ğa keçirildi.
2014 senesi mayısnıñ soñunda Aqmescitte, yarımadanıñ arbiy istilâsına qarşı narazılıq tedbirleriniñ faal iştirakçileri Timur Şaymardanov ve Seyran Zinedinov habersiz ğayıp oldılar. Olarnıñ ğayıp oluvı vaqiası boyunca em Qırımda, em de Ukrainanıñ qıtadaki qısmında cinaiy işler açıldı, lâkin şimdilik tahqiqat iç bir netice bermedi.
Qırımnıñ ilhaqından soñ yarımadada hususan qırımttarlar arasında insanlarnıñ ğayıp oluvı vaqiaları daa sıq yüz kösterip başladı. Aynı zamanda Rusiyeniñ kontroli altında olğan Qırım Tahqiqat komitetinde, «yarımadada qırımtatarlarnıñ kütleviy surette ğayıp oluvı yoq», dep iddia eteler.
Qırım aq-uquq qorçalayıcıları gruppası, alıp qaçuvlar Rusiye ukümeti, ya da olarnıñ kontroli altında olğan paramilitar gruppalar tarafından yapıldı, dep tahmin eteler. Kremlniñ kontroli altında olğan Qırım ukümeti, de facto ğayıp oluv vaqialarını tanıy, lâkin olarğa özüniñ alâqası olğanını inkâr ete.
