Ukraina prezidenti Petro Poroşenko, Ukraina devletiniñ SNGde iştirakiniñ resmen toqtatılmasına dair tekliflerni azırlamağa rica etti.
Poroşenko Kyivdeki XI Telükesizlik forumındaki çıqışı esnasında: «Ukraina iç bir vaqıt SNGniñ azası olmadı ve şimdi de olmağanı içün ve, bu strukturanıñ – yani SNGniñ Rusiye tecavuzını taqbih etmekni red etkenini köz ögüne alıp, men, ukümet ile beraber SNGniñ qanuniy organlarında iştirakimizniñ resmen toqtatılması ve Minskte munasip muessiseler yanında Ukraina temsilciligini soñ şekilde qapatılması boyunca teklifler azırlamamıznı rica etmek ister edim», – dedi.
Bunuñnen birlikte o, Ukraina tarafından SNG çerçivesinde tizilgen uquqiy bazanı, devletniñ milliy menfaatlarına uyğunlığı noqtai-nazarından ğayrıdan baqıp çıqmaq kerek, dep qayd etti.
Ondan ğayrı, Poroşenko, Ukraina ile Rusiye arasında dostluq, emekdaşlıq ve ortaqlıq aqqında añlaşmadaki bir sıra ukümlerniñ lâğu etilmesi ceryanını başlatmaq niyetinde olğanını bildirdi.
Ukraina SNGge (Mustaqil devletler birligi – bazı sabıq sovet cumhuriyetlerinden ibaret teşkilât) aza olğan devlet degil. O, SNGniñ tesis etici devleti ve iştirakçi devleti statuslarına malik. SNG Qırımnıñ işğali boyunca siyasiy qararlarınıñ tasdiqlanmasından çetke çekilgen soñ, 2014 senesiniñ aprelinden başlap Ukrainanıñ SNG çerçivesinde emekdaşlığı eñ alçaq seviyege endirildi.
Donbasstaki silâlı çatışma, 2014 senesinde Qırım Rusiye tarafından ilhaq etilgen soñ başlap, ale daa devam ete. Ukraina ve Ğarp Rusiyeni separatistlerge silâlı şekilde qol tutqanında qabaatlaylar. Kreml bu qabaatlavlarnı inkâr ete, ve Donbassta yalıñız Rusiyeden kelgen «göñülliler» bulunmaq mumkünler, dey. BMTniñ malümatına köre, çatışma esnasında 10 biñden ziyade kişi elâk oldı.
