Ukraina prezidenti Petro Poroşenko Ukraina ile Rusiye arasında dostluq ve emekdaşlıq aqqında añlaşmadaki bazı ukümlerniñ lâğu etüv ceryanını başlatmaq niyetinde. Bunı Azatlıq Radiosı bildire.
Poroşenko Kyivdeki XI Telükesizlik forumında: «Men Ukraina ile Rusiye arasında dostluq, emekdaşlıq ve ortaqlıq aqqında añlaşmada yer alğan, bu añlaşmanıñ işletilmesi devletimizniñ milliy menfaatları ve özümizni mudafaa etmege aqqımıznıñ qullanılmasına zıt kelgen qısımdaki ayrı ukümlerniñ işlemesini deral ve bir taraflama şekilde toqtatılması aqqında qanun leyhasını parlamentke berecem», – dep bildirdi.
Ukraina tış işleri naziriniñ Aropağa integratsiya meseleleri boyunca muavini Olena Zerkalniñ malümatına köre, Donbassta arbiy areketler başlanğan soñ Ukraina ve Rusiye 43 añlaşmanıñ işlemesini vaqtınca ya da tolusınen toqtattılar.
1997 senesinde imzalanğan Rusiye ile dostluq, emekdaşlıq ve ortaqlıq aqqında añlaşma al-azırda işlemektedir. Vesiqa, cümleden, taraflarnıñ «bir-biriniñ topraq bütünligini urmet eteceklerini ve aralarındaki sıñırlarnıñ toqunılmazlığını tasdiqlaycaqlarını» ve, ondan ğayrı, «bir-biri ile munasebetlerni, mustaqil musaviylikni qarşılıqlı urmet etüv, davalarnıñ barışıqlı yolnen çezüv, küç ya da küç qullanma ile qorquzuvnı qullanmama printsipleri esasında quracaqlarını» közde tuta.
Donbasstaki silâlı çatışma, 2014 senesinde Qırım Rusiye tarafından ilhaq etilgen soñ başlap, ale daa devam ete. Ukraina ve Ğarp Rusiyeni separatistlerge silâlı şekilde qol tutqanında qabaatlaylar. Kreml bu qabaatlavlarnı inkâr ete, ve Donbassta yalıñız Rusiyeden kelgen «göñülliler» bulunmaq mumkünler, dey. BMTniñ malümatına köre, çatışma esnasında 10 biñden ziyade kişi elâk oldı.
