BMT Baş kâtibi Antoniu Guterriş ve sabıq AQŞ prezidenti Cimmi Karter Suriyede olğan cenk üzerindeki kontrolni ğayıp etüv telükesinden saqındırdılar. Öz beyanatlarını olar, AQŞ prezidenti Donald Tramp Rusiyeni Suriyede kelecekte yapılacaq darbege azırlanmağa davet etken soñ derc ettiler. Bunı Azatlıq Radiosı bildire.
Antoniu Guterriş BMT Telükesizlik şurasına veto aqqı ile aza olğan devletlerniñ (yani Qoşma Ştatlar, Büyük Britaniya, Fransa, Rusiye ve Çinniñ) elçilerini «al-azırdaki çıqımsız kör soqaqnıñ telükesi munasebeti ile özleriniñ büyük endişelerini tekrar tasdiqlamağa» davet etti. BMT Baş kâtibi, «kontrol altından çıqayatqan vaziyetten çıqmaq kerekligini qayd ettim», dedi.
Cimmi Karter, AR agentligine bergen intervyüde Trampnı, «ülkeni (AQŞnı – QA) tınçlıq içinde qaldırmağa ve Şimaliy Koreya, Rusiye ya da Suriye ile munasebetlerde peyda olğan zıddiyetlerni abartmamağa ya da keskinleştirmemege davet etti.
Aprel 11-de Tramp Twitter içtimaiy ağında: «Azırlan, Rusiye, çünki olar (raketalar – QA) uçıp kelecek – yahşı, yañı ve aqıllı. İnsanlarnı öldürgeninden zevq alğan canavar qatil ile ortaqlıq yapmaq olmay», dep yazdı.
Aftanıñ başında Tramp, 24-48 saat içinde ihtimallı himiyeviy ucüm içün Suriyege qarşı cevap olaraq alınacaq tedbirler aqqında qarar berecegini bildirdi, lâkin, şimdilik, yapacaq areketlerini ilân etmedi.
Ukümetke muhalif olğan «Beyaz miğfer»niñ vekilleri ve diger gruppalarnıñ faaliyetçileri, aprel 7-de, qaranlıq çökken maalde Suriyedeki Duma şeerine helikopterlerden toksik gazlı bombalarnıñ atılğanını bildirdiler. Elâk olğan ve zararlanğanlar aqqında bildirilgen edi.
Ğarp devletleri, Suriye prezidenti Başar Asadnıñ rejimi, Rusiye ve İrannı ihtimallı himiyeviy ucüm içün mesuliyetli sayalar. Damask ve Moskva himiyeviy ucümniñ olğanını inkâr eteler.
