Kremlniñ kontroli altında olğan Aqmescitteki Merkeziy rayon mahkemesi «fevral 26 işi» boyunca oturışuvını nevbetteki sefer başka künge avuştırdı.
Qırım.Aqiqat muhbiriniñ mahkeme zalından bildirgenine köre, bundan evel oturışuvlar muhakeme etilgen Eskender Kantemirovnıñ hastalığı sebebinden avuştırıla edi.
Bu sefer o, mahkemege keldi ve, sağlığı mahkeme oturışuvlarında iştirak etmege imkân bere, dep bildirdi. Aynı zamanda bu işniñ diger figurantı – Mustafa Degermenciniñ advokatı Aleksandr Solodkov oturışuvğa keçke qala edi.
Qorçalayıcınıñ ahır-soñu oturışuvğa kelgenine baqmadan, akem «fevral 26 işi»niñ baqılmasını aprel 24, saat 11:30-qa avuştırmağa qarar berdi.
2015 senesinde, Qırım Yuqarı Radası binasınıñ divarları yanında 2014 senesi fevral 26-da Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme başlandı. Olar kütleviy qarışıqlıqlarda iştirak etkenlerinde qabaatlana.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
