Ukraina prezidenti Petro Poroşenko Büyük Britaniya baş naziri Tereza Mey ile, «tecavuzkâr areketler»ine cevaben Rusiyege qarşı sanktsiyalarnıñ sertleştirilmesini muzakere etti. Bunı Ukraina prezidenti memuriyetiniñ matbuat hizmeti bildirdi.
Prezidentniñ memuriytinde bildirilgenine köre, suhbetdeşler havfsızlıq ve mudafaa saalarında eki taraflı emekdaşlıqnıñ kenişletilemesi meselelerini muzakere ettiler.
Bildirüvge köre, Poroşenko, sabıq istihbarat hadimi Sergey Skripal ve onıñ qızı Yuliyanıñ Britaniyadaki Solsberi şeerinde zeerlenmesiniñ tahqiq etilmesinde Ukrainanıñ yardım etmek azır olğanını bildirdi.
Büyük Britaniya Qırımnıñ Rusiye tarafından ilhaqını taqbih ete ve Moskvanı Ukrainanıñ şarqındaki separatistlerge qol tutqanında qabaatlay. Soñki aynıñ içinde, Skripalniñ zeerlenmesi neticesinde eki devlet arasındaki munasebetler bayağı fenalaştı. Britaniya ukümeti Rusiyeni, buña alâqadar olğanında qabaatlay. Moskva bunı inkâr ete.
