Ukraina prezidentiniñ Qırım Muhtar Cumhuriyetinde dayimiy temsilcisi Boris Babin, Qırım sakinleri Ukrainadaki saylavlarda iştirak ete bilmeleri içün qanunlarğa kirsetilecek deñişmeler azırlana, dep bildire. Bunı o, Liga.net neşiri içün bergen intervyüde dedi.
Babin: «Biz Qırım sakinleriniñ saylavlarda iştirak ete bilmeleri içün imkân yaratmaq isteymiz. Bunıñ içün biz qanunlarğa kirsetilecek deñişmelerni azırlaymız. Meselâ, Qırım sakinlerinde saylavlarğa belli bir muddet qalğanda qıtada ayırılğan saylav bölüklerinde rey bermege imkân olsun deye. Bizde er ay memuriy sıñır hattını yüz biñ qadar kişi keçe – memuriy hizmet almaq, hümanitar, tibbiy, tasil ile alâqalı ve diger meseleler boyunca. Olar, deyelim ki, eki ay devamında mahsus teşkil etilgen saylav bölüklerinde rey bere bileceklerini bilse, ve böyle bölüklerniñ sayısı yeterli olsa – olar kelir ve rey berirler», – dep ikâye etti.
O, rey berüv sistemasını 2019 senesi Ukraina parlamenti saylavına qadar deñişterecek olğanlarını ilâve etti.
Ukrainada soñki prezident saylavı 2014 senesiniñ mayısında, parlament saylavı ise aynı yılnıñ oktâbrinde olıp keçtiler.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
