Ukraina Tasil ve ilim nazirligi 2017 senesinde Qırım abituriyentleri içün qıtada 2600 yer ayırdı, lâkin yeterli derecede malümat berilmegen içün bu sadeleştirilgen kiriş tarzından yalıñız eki yüz kişiden biraz daa ziyadesi faydalana bildi.
Bunı Qırım.Aqiqat Radiosı efirinde Ukraina Tasil ve ilim nazirliginiñ aliy malümat şubesi yanındaki köçürilgen aliy oquv yurtları bölüginiñ rehberi Svetlana Kretoviç bildirdi ve, Rusiye artıq Qırım sakinlerine aliy oquv yurtlarında imtiyazlı yerler ayırmay, dep qayd etti.
Memure: «Umumen, 2017 senesinde sadeleştirilgen kiriş tarzından 206 kişi faydalandı – ve bu 2016 senesine nisbeten daa çoqtır. Menim fikrimce, böyle köstergiçniñ sebebi, Qırım sakinleriniñ bu imkân aqqında bilmegenleridir. Bu sebepten biz, bütün cemiyet teşkilâtlarını, hususan Qırım sakinlerini haberdar etüv saasında Ukraina Tasil ve ilim nazirligine yardım etmege davet etemiz. Ondan ğayrı, biz Rusiye aliy oquv yurtları boyunca vaziyetni közetemiz: 2016 senesinde olar Qırım sakinleri içün nasıldır kvotalar ayırğan olsa da, 2017 senesinde endi böyle şey iç de olmadı. Şimdi Rusiyede yarımadanıñ sakinleri içün iç bir imtiyaz yoq», – dep qayd etti.
Svetlana Kretoviç, Tasil nazirligi öz ögüne, Ukraina aliy oquv yurtlarına kirgen Qırım sakinleriniñ tam sayısını esaplamaq vazifesini qoymay, çünki bu obyektiv surette qıyın, ve açıq irişüvde olğan er angi malümat Rusiye ukümeti tarafından abituriyentlerniñ ailelelrine qarşı qullanıla bilecek, dep ilâve etti.
2018 seneside iyün 4-ten sentâbr 28-ne qadar Qırım sakinleri Ukrainanıñ qıtadaki qısmında bulunğan aliy oquv yurtlarına sadeleştirilgen kiriş tarzda, tışqı mustaqil baalavdan (VNO) keçmeden oqumağa kire bileler. Keçken sene olğanı kibi, ilhaq etilgen yarımadadan kelgen abituriyentlerge devlet sımarışı yerlerine kvotalar ayırılacaq: bıltır 2600 yer ayırıldı; bu yıl qararnen kene o qadar yer ayırılacağı beklenile. Kefalet etilgen kvota boyunca oqumağa kirmek içün Qırım sakinleri iyül 23-ke qadar vesiqalarnı teslim etmek kerekler.
