Facebook, Rusiye tarafından qol tutuv körgen ve içtimaiy ağnı, şu cümleden saylavlar vaqtında, cemiyet fikrini öz istegine köre idare etmek içün qullanğan gruppalar ile «silâlar qoşusı» vaziyetinde buluna. Bunı şirketniñ tesis eticisi Mark Tsukerberg AQŞ Kongressinde bergen ifadeleri esnasında bildirdi.
Tsukerberg: «Rusiyede öyle bir insanlar bar ki, işleri bizim sistemalarımız ve diger internet sistemalarını öz menfaatları içün qullanmaqtır… Yani bu, «silâlar qoşusı»dır», – dedi.
O, Facebooknıñ, saylavlar neticelerini deñiştirmek teşebbüslerini toqtatmaq imkânına saip olması içün paralar yatırmaq pek muimdir, dep ilâve etti.
Tsukerberg, yılnıñ soñuna qadar şirketi 20000-den ziyade telükesizlik meseleleri ve kontentniñ közden keçirilmesi boyunca mutehassısnı işke almaq istey, dep qayd etti.
Ondan ğayrı o, Facebooknıñ, suniy intellekt yardımı ile, sahte esaplarnı tapmaq içün yañı vastalar işlep çıqqanını bildirdi.
Tsukerbergniñ aytqanına köre, o, AQŞta 2016 senesi prezident kampaniyası esnasında Facebookniñ «Rusiye informatsion operatsiyalarınıñ aşkâr etilmesinde yavaş olğanına» peşman ete.
O, istimaiy ağınıñ, 2016 senesinde AQŞtaki prezident saylavına Rusiyeniñ ihtimallı qarışqanını tahqiq etken mahsus prokuror Robert Müller ile emekdaşlıq yapqanını qayd etti.
Malümatnıñ talili ile oğraşqan Britaniyanıñ Cambrige Analytica şirketini, AQŞta saylav aldı kampaniyasında Facebook qullanıcılarınıñ şahsiy bilgilerini qullanğanında qabaatladılar.
Aprel 4-te Facebook şirketi, esas olaraq AQŞta yaşağan 87000000 kişiniñ bilgileri Cambrige Analytica siyasiy mesleat etici şirketininiñ qoluna tüşti, dep bildirdi.
Aprel 6-da Tsukerberg, Facebook dünyada saylavlarğa qarışuv ile küreşmek içün yañı aletler tatbiq ete, dep bildirdi. O, 2016 senesinde AQŞ prezidenti saylavına Rusiyeniñ qarışqanı aşkâr etilgen soñ Facebook tarafından, on biñlerce sahte esaplarnı yoq etmege yardım etken yañı qorçalav aletleriniñ tatbiq etilgenini qayd etti.
