Türkiyedeki qırımtatar diasporasınıñ vekilleri «Qırımğa dostluq yolu» leyhasını başlattılar. Onıñ çerçivesinde toquma parçalarından simvolik keten meydanğa ketirilip, onı ilhaq etilgen Qırım ile memuriy sıñırğa ketirip berecekler.
Leyhanıñ teşkil eticisi olğan Gebze şeeri qırımtatar cemaatınıñ Qırım.Aqiqatqa añlatqanına köre, leyhada er istegen iştirak etmek mumkün. Bunıñ içün teşkil eticilerge taraflarınıñ ölçüleri 21 santimetr olğan ve üstünde qatılmaq istegenniñ adı ve soyadınıñ birinci arifleri ile yaşağan şeeri yazılğan toquma parçasını yollamaq yeter.
Toquma parçaları toplanğan sayın olarnı bir umumiy keten etip bir-birine tikecekler, ve bu şekilde olar «endi beşinci yıl işğal altında bulunğan Qırım ile birlik ve birdemlikniñ» simvolı olacaqlar.
Türkiyeniñ Aksaray şeerindeki qırımtatar cemaatınıñ başlığı Ahmet Kırımlı: «Bu leyha birdemlik ve birlikniñ simvolı ola. Ekincisi, bu, nevbetteki kere Qırım aqqında aytmaq imkânıdır. Biz birleşmek ve birlikte olmaq kerekmiz. Bundan dolayı bu leyha, bu mesajnı eñ güzel şekilde aks ete», – dedi.
Teşkil eticilerniñ aytqanına köre, tedbirde iştirak etmek içün birinci olıp Türkiyedeki qırımtatar diasporasınıñ vekilleri ve olardan ğayrı, 2014 senesinde yarımada Rusiye tarafından ilhaq etilgen soñ Qırımdan Türkiyege köçkenler seslendi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
