Ukraina musulmanlarınıñ birleşmesi (AMU) Qırım Muhtar Cumhuriyeti musulmanlarınıñ diniy idaresi (QMA MDİ) ve Şevçenko adına Kyiv milliy universitetiniñ tarih fakulteti ile birlikte üyken sınıflarnıñ talebeleri arasında islâmnı bilüv boyunca olimpiadani keçirdiler. Bunı Qırım.Aqiqatqa AMUnıñ başlığı Suleyman Hayrullayev bildirdi.
Onıñ aytqanına köre, olimpiadanıñ birinci basamağında Ukrainanıñ türlü bölgelerinden 70 qadar üyken sınıf talebesi iştirak etti.
AMU başlığı: «Olar esse yollağan ediler. Komissiya eñ yahşı olğan 30-nı sayladı. Ondan soñ eñ yahşı olğan 30-nıñ sırasına kirgenler Kyivdeki ekinci basamaqqa keçti. Olar testler yazdı. Belli bir sebeplerden dolayı Qırım sakinleri iştirak etmedi, lâkin Mariupolden iştirak etken bir qırımtatar qızı bar edi», – dedi.
Hayrullayev, kelecekte şarqşınas olmaq istegenler içün islâm ve Şarq devletleriniñ medeniyeti aqqında bilgilerni vastasız surette musulmanlardan almaq pek muim, dedi.
AMU başlığınıñ aytqanına köre, olimpiadada Donetsk vilâyetiniñ vekili oğan bir qız ğalebe qazandı.
2017 senesiniñ noyabrinde AMU ve Şevçenko adına KMUnıñ tarih fakulteti islâm medeniyetiniñ birlikte ögrenilmesi ve populârlaştırılması aqqında memorandum imzaladılar. Memurandum, ilmiy-teşkerüv faaliyetinde ve islâm medeniyeti aqqında bilgilerniñ populârlaştırılmasında emekdaşlıqnı ve, ondan ğayrı, studentlerniñ fakultetteki «şarqşınaslıq» ihtisası boyunca tasil almalarına qol tutuvnı közde tuta. Memorandum, KMUnıñ tarih fakulteti bazasında Musulman halqlarını ögrenüv merkeziniñ meydanğa ketirilmesini de közde tuta.
AMU, Ukrainanıñ qıtadaki qısmına köçken Qırım musulmanları ve olarnen birlikte diger bölgelerden olğan dindaşları tarafından meydanğa ketirildi. Aynı zamanda Qırım Muhtar Cumhuriyeti musulmanlarınıñ diniy idaresi yanındaki ulemalar şurasınıñ başlığı olğan Suleyman Hayrullayev AMUnıñ başlığı ola.
