Rusiye FSB başlığı Aleksandr Bortnikov, telükesizlik hadimleri Keriç boğazı saasındaki vaziyetniñ, şu cümleden «terroristik tecavuz telükesiniñ red etilmesi» içün kontrol etkenlerini iddia ete. Bunı o, salı künü, aprel 10-da Rusiyeniñ terrorizmge qarşı komitetiniñ oturışuvında çıqışta bulunğanda bildirdi.
Rusiye kütleviy haber vastaları: «Telükesizlik strukturaları tarafından Keriç boğazı saasında ve onıñ üstündeki ava boşluğunda vaziyetniñ kontroli teşkil etildi. Qurulmaqta olğan obyektler içün terroristik tecavuz telükesi peyda olğan taqdirde olarnıñ quvetleri ve vastaları birlikte yapılacaq areketlerge azırlar», – dep Bortnikovnıñ sözlerini naqil eteler.
O, qurulmaqta olğan Keriç köprü üstünden avtomobil areketiniñ açılması beklenilgenini köz ögünde tutıp, bu vaziyette keçitniñ naqliyat içün havfsızlığını temin etmek kerek, dep qayd etti.
Bortnikov: «Obyektlerge qavuşqan su saasına izinsiz kirilmesine yol bermemek içün şaraitni yaratmaq maqsadınen naqliyat infrastrukturası obyektleriniñ telükesizlik zonalarını tayin etüv meselelerini tertipke qoyğan normativ uquqiy bazanıñ mukemmelleştirüvge ihtiyacı bar», – dedi.
Keçken seneniñ dekabrinde, işçilerniñ ilhaq etilgen Qırım ile Rusiyedeki Taman şeeri arasında qurulğan köpürniñ avtoyol qısmındaki közlerni cıymağa bitirgenleri aqqında bildirilgen edi.
Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpürni 2018 senesine qadar qurmağa ve 2019 senesiniñ yazında işletmege açmağa vade ettiler.
Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.
