Link açıqlığı

Saatnıñ esas haberi

Aqmescitteki «Hizb ut-Tahrir işi» figurantlarınıñ tevqifi eki ayğa uzatıldı – advokat


Kremlniñ kontroli altında olğan Qırım Yuqarı mahkemesi aprel 10-nda Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ tevqifini eki ayğa uzattı. Bunı Qırım.Aqiqatqa qabaatlanğanlardan biriniñ advokatı Sergey Legostov bildirdi.

Legostov: «Er biriniñ mahkemesi ayrı-ayrı yapıldı. Men Uzeir Abdullayevni qorçaladım. Oña eki ayğa – 2018 senesi iyün 11-ge qadar uzattılar. Qalğanlarğa da, mence, aynen böyle yaptılar», – dedi.

«Qırım birdemligi» birleşmesi, bu işniñ figurantlarına tevqifniñ uzatılmasını advokat Ayder Azamatov tasdiqlay, dep yaza.

Fevralniñ başında Rusiye mahkemesi Aqmescitteki «Hizb ut-Tahrir işi» figurantlarını aprelniñ başına qadar tevqif etilgen alda qaldırdı.

2016 senesi oktâbr 12-de Qırımdaki beş musulman qorantası tintildi. Tintüvlerniñ neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov yaqalandı.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.

XS
SM
MD
LG