«Ukrenergo» milliy energetik şirketi, ilhaq etilgen Qırımda ğayıp etken aktivleri boyunca Rusiye ile yatırım davasını başladı.
Bunı şirketniñ mudiri vazifesini vaqtınca eda etken Vsevolod Kovalçuk Facebook içtimaiy ağındaki saifesinde bildirdi.
«Bir qaç kün evel «Ukrenergo» rusiyelilerge, şirketimizniñ Qırımdaki aktivlerine dair yatırım davası boyunca resmiy yazılı bildirüv taqdim etti», – dep bildirdi o.
Kovalçuk, mektüplerni Rusiyeniñ yüksek maqamlı memurları – tış işleri naziri Sergey Lavrov, maliye naziri Anton Siluanov, adliye naziri Aleksandr Konovalov, baş nazir Dmitriy Medvedev ve Rusiye prezidenti Vladimir Putin aldılar, dep bildirdi.
Onıñ aytqanına köre, «Ukrenergo»nı bu davada, daa evel «Naftogaz Ukrainı» Milliy aktsiyalı şirketine aynı bunıñ kibi davanı açmağa yardım etken Covington & Burling LLP halqara adliye şirketiniñ adliyecileri temsil etecekler.
Kovalçuk: «Sentâbrniñ soñuna qadar davanı barışıqlı yolnen uyğunlaştırıp olamasaq, artıq «Naftogaz» yapqan kibi, Halqara arbitrajda Rusiyege qarşı dava aça bilecekmiz. Davamız yalıñız yarımadanıñ ilhaqı neticesinde ğayıp etken mal-mülkümiz ile degil, aynı zamanda bu ğayıpnıñ neticesinde alıp olamağan kelirlerimiz ile de alâqalı olacaq», – dep tafsilâtlar bildirdi.
Kovalçuk, Qırımda ğayıp etilgen aktivlerge qararnen 1 mlrd dollar olaraq qıymet kese.
Kovalçuk, «Ukrenergo»nıñ dava boyunca ara qararınıñ qabul etilmesi seviyesine endi 2018 senesiniñ soñunda yetecegini bekley.
Rusiye tarafından bu hususta açıq menbalarda izaatlar berilgeni yoq.
«Ukrenergo» Ukraina energosistemasınıñ dispetçerligini yapa ve elektrik energiyanı elektrik stantsiyalardan energiya ile temin etici şirketlerniñ ağlarına iriştire.
