Hongkong fond birjasınıñ malümatına köre, Rusiye oligarhı Oleg Deripaskağa ait UC Rusal şirketiniñ aktsiyaları aprel 9-da AQŞ tarafından tatbiq etilgen sanktsiyalarnıñ neticesinde bir kereden 50%-den ziyade ucuzladılar.
Rusal bütün kredit mecburiyetleriniñ eda etilmesine qol tutqanını bildirse de, bu, onıñ AQŞ Maliye nazirligi tarafından tatbiq etilgen sıñırlanmalar neticesinde tehnik defoltlarnıñ telükesi bar, dep bildirgeninden soñ oldı.
Oleg Deripaskağa ait UC Rusal, aprel 6-da AQŞ tarafından qarşılarına yañı sanktsiyalar tatbiq etilgen Rusiye şirketleri arasında yer aldı. Rusaldan ğayrı sıñırlanmalar iş adamınıñ daa eki büyük aktivine – «Bazovıy element» ve «EN+Group»qa qarşı tatbiq etildi. Aprel 6-da London birjasınıñ qapatılması anında şu soñki şirketniñ aktsiyaları 20,9%-ge eksildi. Umumen, sıñırlamalarnıñ tatbiq etilmesi bildirilgen soñ aprel 6-da Deripaskanıñ şirketleri 2,5 milliard dollarğa ucuzladılar.
İqtisadiyatçı, Vaşingtondaki «Atlantik şurası» teşkerüv teşkilâtınıñ Rusiye boyunca mutehassısı Anders Aslund Azatlıq Radiosına: «Yañı sanktsiyalar şimdiki AQŞ prezidenti Donald Tramp memuriyetiniñ ğayet ciddiy işmarı olaraq körüne, çünki olar «Putinniñ eñ yaqın etrafındaki toqunılmaz insanlarğa» toqunalar», – dedi. Aslund, yañı sanktsiyalar Oleg Deripaskağa ait Rusal şirketiniñ mahv etilmesine ketirmek mumkünler, dep tahmin ete.
Daa evel Rusiye muhalefet siyasetçisi Aleksey Navalnıy, Oleg Deripaskanıñ işi, oña qarşı tatbiq etilgen Amerika sanktsiyaları sebebinden ciddiy şekilde zarar körmek mumkün, dep bildirdi.
Aprel 6-da AQŞ Maliye nazirligi 24 rusiyeli, ve şu cümleden yedi Rusiye oligarhı, olarnıñ kontroli altında olğan 12 şirket, Rusiyeniñ 17 yüksek maqamlı vazifeli şahsı ve, ondan ğayrı, «Rosoboronprom» şirketi ile onıñ tarafından kontrol etilgen bankqa qarşı sanktsiyalarnı tatbiq etti.
Sanktsiyalarğa oğrağanlar arasında iş adamları Oleg Deripaska ve İgor Rotenberg, «Gazprom»nıñ rehberi Aleksey Miller, içki işler naziri Vladimir Kolokoltsev bulunalar.
Rusiye Tış işleri nazirligi, Moskva AQŞnıñ yañı sanktsiyalarını «sert bir cevapsız» qaldırmaz, dep bildirdi.
