Link açıqlığı

Saatnıñ esas haberi

Hersonda Bağçasaraydaki Han sarayı-muzeyniñ mahv etilmesi içün telükesi olğanı sebebinden UNESCOğa yollanacaq muracaatqa qol tutuv imzalarını toplaylar. Tedbir bitken soñ imzalarnı Qırım faaliyetçilerine berecekler. Bunı Qırım.Aqiqatqa tedbirniñ teşkil eticilerinden biri ve Herson şeer Qırımtatar Milliy Meclisiniñ başlığı İbragim Suleymanov bildirdi.

Suleymanov: «Biz yerli seviyede meselege diqqat çeke bildik. Pek çoq kişi bunı bilmey edi, ve biz, Herson sakinleriniñ iç olmadı böyle etip yarımadada işğalci ukümet tarafından yapılğan qanunsızlıq aqqında bileceklerinden ve Qırımnıñ problemaları ile tanış olacaqlarından memnünmiz», – dep qayd etti.

Daa evel Herson Vilâyet devlet memuriyeti yanındaki Ukrainanıñ milliy azlıqları ve tamır halqları şurası, UNESCOğa, Bağçasaraydaki Han sarayında sözde restovratsiya işleriniñ toqtatılması içün maksimum küç-quvetni sarf etmek ve, ondan ğayrı, sarayğa ketirilgen zararnı tayin etmek içün oña halqara ekspertlerni yibermek ve UNESCOnıñ rehberligi altında ğayrıdan tiklev işlerini teşkil etmek ricası ile muracaatqa qol tuttı.

Mart 19-da Kyivde Ukrainadaki Rusiye elçiligi yanında Qırımda Han sarayınıñ viran etilmesine qarşı tedbir keçti.

Rusiye ukümeti Bağçasaraydaki Han sarayında «qazağa qarşı ilk nevbetteki işler»ni yapmağa devam ete. Ukraina Medeniyet nazirligi, Qırımdaki Rusiye ukümeti tarafından Bağçasaray qoruğınıñ territoriyasında işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.

Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Girey hanlarına ait yazlıq rezidentiya yeri. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.

XS
SM
MD
LG