Link açıqlığı

Saatnıñ esas haberi

Tramp: Putin, Rusiye ve İran Suriyede himiyeviy silânıñ qullanılması içün cevapkârlar


Donald Tramp
Donald Tramp

AQŞ prezidenti Donald Tramp, Rusiye prezidenti Vladimir Putinni ve İrannı «canavar Asad»ğa qol tutuvda qabaatlap, Suriyedeki himiyeviy ucümni taqbih etti. Tramp, aralarında qadınlar ve balalar olğan çoq sayılı qurbanlarğa ketirgen «aqılsızca» himiyeviy ucüm içün Asad büyük fiyat ödemek kerek, dep bildirdi.

Bunı Tramp özüniñ Twitterdeki saifesinde yazdı.

AQŞ prezidentiniñ bildirüvinde: «Çoq elâk olğan kişi, şu cümleden qadınlar ve balalar Suriyede himiyeviy ucümniñ qurbanı oldılar. Bu cinayet yüz köstergen rayon Suriye ordusı tarafından blok etilgen ve qamaçavğa alınğan, bunıñ neticesinde diger ülkelerden şaatlar anda irişemeyler. Prezident Putin, Rusiye ve İran canavar Asadğa qol tutqanları içün cevapkârlar…», – denile.

Bazar künü Suriyede, bunıñ arfesinde, aprel 7-de Şarqiy Guta bölgesinde isyancılarnıñ qolunda olğan Dimaşq yanındaki qısmına qarşı yapılğan himiyeviy ucüm qurbanlarınıñ sayısı aqqında yañı malümatnı bildirdiler.

Farqlı bildirüvlerge köre, onlarca qurbanlarından baas etile – 40-tan 70-ke qadar. Bu raqamlarnı «Beyaz miğferler» adınen belli olğan Suriye vatandaşlar mudafaası teşkilâtı bildire. Elâk olğanlarda himiyeviy silâ qullanılmasınıñ alâmetleri bar – kenişlegen köz bebekleri ve ağızdan çıqqan köpük.

Duma şeerindeki himiyeviy ucümniñ neticesinde zarar körgenlerniñ sayısı – yüzlernen kişi.

AQŞta daa aprel 7-de, himiyeviy ucüminden aman soñra, Vaşingtonnıñ, Suriye ukümet quvetleri tarafından himyeviy silâ qullanılmasınıñ yañı bir deşetli adisesi aqqında pek endişeli haberlerni diqqatnen taqip etkenini bildirdiler. AQŞ Devlet departamentiniñ beyanatında bildirilgenine köre, Suriye ukümetine qatiyen qol tutqan Rusiyeniñ bunıñ içün esas mesüliyeti bardır.

Devlet departamentinde: «Rejim tarafından öz halqına qarşı himiyeviy silânıñ qullanılması tarihı iç şübhe doğurmaz», – dep ilâve ettiler.

Suriye ukümeti ve onıñ ittifaqdaşı Rusiye bu bildirüvni sahte deyler.

XS
SM
MD
LG