Suriyede aprel 7-de Şarqiy Guta bölgesinde isyancılarnıñ qolunda olğan Dimaşq yanındaki qısmında himiyeviy silânıñ qullanılması aqqında bildirdiler.
AQŞta bulunğan Suriye-Amerika tıbbiy cemiyetinde, adise yüz köstergen yerden alınğan malümatqa atıf etip bildirilgenine köre, bir qaç ucümniñ neticesinde elâk olğanlarnıñ sayısı eñ az 35 kişini teşkil ete.
Tıbbiy cemiyetniñ prezidenti Bazel Termanininiñ Reuters haber agentligine bildirgenine köre, hlorlı bomba Duma şeeriniñ hastahanesine tüşti. Bu ucümniñ neticesinde altı kişi elâk oldı.
Ekinci ucüm başqa bir evge, zeerli maddeler ve şu cümleden siñirni felç yapıcı gaznıñ qullanıluvı ile yapılğan edi.
«Biz BMT, AQŞ ve Avropa devletleriniñ ukümetleri ile bağlanamız», – dep ilâve etti o.
Agentlik, bu bildirüvlerni mustaqil menbalardan teşkerip olamağanını yaza.
Ondan ğayrı, himiyeviy ucümniñ delilleri olğanı aqqında Suriyeniñ «Beyaz miğferler» vatandaşlar mudafaası teşkilâtı bildire.
İçtimaiy ağlarda, elâk olğanlar ve şu cümleden balalarnıñ ağızlarında köpük ile fotosuretlerrini derc eteler. Ondan ğayrı yüzlerce zararlanğanlar aqqında bildirile.
Suriyeniñ devlet kütleviy haber vastaları, himiyeviy ucümniñ ukümet ordusı tarafından yapılğanını red ete ve isyancılar mağlübiyetke yaqın olğanları içün yalan haberlerni dağıtalar, dep bildireler.
Suriye ordusı ve onıñ ittifaqdaşları Duma şeerine top atılmasını ve avadan ucümlerini arttırdılar. SANA devlet agentligi bunıñ, artıq ukümetniñ kontroli altında olğan qomşu territoriyalarğa top atqanları içün isyancılardan öç aluvı olğanını bildirdi.
Suriye ordusı ve Suriyede uküm sürgen rejimniñ tarafında cenkleşken Rusiye arbiyleri, ukümet küçleri ve olarnıñ ittifaqdaşları Şarqiy Gutanıñ isyancılarnıñ kontroli altında olğan qısmını aman-aman tolusınen zapt ettiler, dep bildireler. Soñki künlerde Rusiyeniñ aracılığı ile yapılğan añlaşma boyunca Duma şeerinden biñlerce kişi evakuatsiya etildi. Lâkin aprel 5-te, añlaşmanıñ nevbetteki bozuluvı sebebinden evakuatsiya toqtatıldı.
