«Tavrida» trassasınıñ qurucıları tarafından yüksek talap olğanı içün Qırım ocaqları kireçtaşnıñ çıqarılmasını qat-qat arttırdılar. Meselâ, Qarasuvbazar rayonında çıqarıluv 2,5 qat arttı. Bunı aprel 8-de Qırım.Aqiqatqa İnsan aqları boyunca Qırım alâqa gruppasınıñ koordinatorı Abdureşit Cepparov bildirdi.
Aq-uquq qorçalayıcısı, Qarasuvbazar rayonı memuriyetiniñ Rusiyege tabi rehberi tarafından faaliyetleriniñ neticeleri aqqında berilgen er yıllıq esabattaki malümatqa atıfta bulunıp: «Çaqılğa büyük talapnıñ mevcüt olması içün yañı ocaqlar açıldı. Türlü büyüklikte sanayı ve qurucılıq kireçtaşları, qum ve çaqılnıñ çıqarılmasında ihtisaslaşqan OOO «Belogorskoye karyeroupravleniye», AO «Ulyanovskiye izvestnâki» ve OOO «Belogorskiye izvestnâki» işhaneleri 2017 senesinde işleri ve hizmetleriniñ kölemini 240%-ge arttırdılar», – dep bildirdi.
Yalıñız 2015 senesinde Kremlniñ kontroli altında olğan Qırım ukümeti faydalı çıqarılmalarnıñ işletilmesi içün 40-tan ziyade litsenziya berdi. 2016 senesinde ise sekizi – pıçılğan kireçtaş, üçü – qum ve çaqıl qarışması ve ekisi – qum yataqları olaraq 14 yañı yataq açıldı.
Kontrolsiz çıqarıluv neticesinde yarımadanıñ ğarbiy yalısındaki plâjlarnıñ meydanlığı bir qaç qat eksildi. Doñuzlav gölüniñ yanındaki territoriya sahrağa çevirile. Qırım dağları ise ufatıcı tertibatlarnıñ darbeleri altında ğayıp olalar.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
