Link açıqlığı

Saatnıñ esas haberi

FSB hadimleri Canköy rayonındaki köynıñ camisini tinttiler – «Qırım birdemligi»


Rusiye Federal telükesizlik hizmetiniñ hadimleri aprel 6-da tintüv ile ilhaq etilgen Qırımda Canköy rayonınıñ Kerlevüt (Pavlovka) köyüne keldiler.

Bunı «Qırım birdemligi» cemiyet birleşmesi, adiseniñ şaatlarına atıfta bulunıp, Facebookta bildire.

«Qırım birdemligi»niñ bildirüvinde: «Canköy rayonındaki Kerlevüt köyüniñ camisine FSB hadimleri keldi. Olar, bu yerde «nasıldır esktremistik tedbirler»niñ yapılğanını bildirdiler. Camideki bütün musulmanlar soraştırıldı ve resimge çıqarıldı. Böyle total kontrol musulman cemiyeti azalarını taacipte qaldıra ve Qırım musulmanlarınıñ nefretini doğura», – denile.

Faaliyetçilerniñ malümatına köre, qararnen 20 silâlı kişi camini qamaçavğa alıp, bütün musulmanlarnı sorğulamağance kimsege çıqmağa izin bermedi.

Tintüvniñ şaatlarından biri, İzzet ağa, Rusiye telükesizlik hadimleri, sanki, camide ötkerilgen «ekstremistik tedbirler»ge şikâyet berilgen içün teşkerüv ile keldiler.

«Olar (telükesizlik hadimleri – QA) öz şeadetnamelerini köstergen soñ prokuror hanım vesiqalarnı köstermege rica etti. Lâkin bizden kimse namazğa vesiqalarnen kelmedi. O zaman FSB hadimi dosye çıqardı ve namazğa qatnağanlarnıñ soyadlarını oqumağa başladı… Añlağanıma köre, bu malümatnı evelden topladılar», – dedi o.

İlhaqtan soñ Qırımda Rusiyeniñ amelde akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapa.

XS
SM
MD
LG