Suriye ukümet ordusı ve onıñ ittifaqdaşları Şarqiy Gutadaki Duma şeeriniñ topqa tutuluvı ve avia darbeleriniñ intensivligini arttıralar, dep bildire aq-uquq qorçalayıcıları.
Büyük Britaniyada bulunğan Suriyeniñ insan aqları boyunca observatoriyası aprel 7-de, gece yarısından başlap, Suriye ve Rusiye uçaqlarınıñ şeerge qarşı eñ azından 30 darbe endirgenlerini bildirdi.
Aq-uquq qorçalayıcılarınıñ malümatına köre, helikopterler kün devamında Dumağa eñ azından patlayıcı madde ile tolu 25 konteynerni tüşürdiler. Bunıñ neticesinde eñ azından sekiz kişi elâk oldı.
Aprel 6-da, 10 kün devam etken sakinlikten soñ Suriye ukümet ordusı ve onıñ ittifaqdaşları şeerge ucüm ettiler.
SANA Devlet haber agentligi ucümniñ, Dumanı kontrol altında tutqan «Caiş al-İslâm» gruppirovkası tarafından Suriye ukümeti kontrol etken territoriyalarnıñ topqa tutulmasına cevap olğanını qayd ete edi.
Evakuatsiyanıñ aprel 5-te toqtatılğanına baqmadan, soñki künlerde şeerni biñlerce kişi terk etti.
Suriye ukümet ordusı Rusiyeniñ arbiy qol tutuvı ile bu yılnıñ fevralinde paytaht Dimaşqqa qavuşqan ve rejimniñ duşmanı olğan isyancılar tarafından soñ zamanlarğa qadar kontrol etilgen Şarqiy Guta bölgesine ucümini quvetleştirdi. BMTniñ topqa tutuvlarını toqtatmağa davet etkenine baqmadan, ucüm devam etti ve, közeticilerniñ malümatına köre, vatandaşlar ealisi arasında 1,5 biñden ziyade qurban olğanına ketirdi.
Suriyeniñ şimalinde Türkiye ile sıñır yanında yanvarniñ ekinci yarısından başlap, Türkiye ordusı ve onıñ yerli suriyeli ittifaqdaşları Afrin bölgesinde Suriye kürtlerine qarşı operatsiyanı alıp bardılar.
