Ukraina prezidenti Petro Poroşenko, Fransanıñ Milliy meclisindeki «Fransa-Ukraina» dostluq gruppasınıñ reisi Valeriya For-Muntân başlığında fransız parlamentarlarını «Qırımda işğalci ukümet ile er türlü alâqalarğa yol bermemege» davet etti.
Bunı aprel 6-da Ukraina devleti başlığınıñ matbuat hizmeti Poroşenkonıñ fransız parlamentarları ile körüşüvi neticesi boyunca bildirdi.
Bildirüvde: «Prezident parlamentarnı Qırımda işğalci ukümet ile er türlü alâqalarğa yol bermemek içün öz noqtai-nazarlarını faal surette ifade etmege davet etti», – denile.
Rusiye ukümeti, ecnebiy vatandaşlarnı Qırım territoriyasına davet etip, onıñ işğalini qanuniyleştirmege tırışa.
Ukraina Tış işleri nazirliginde, ecnebiy siyasetçilerniñ Qırım ziyaretleri resmiy statusqa malik degil, dep defalarca bildirdiler. Ukraina tış işleri muessisesi ecnebiy vatandaşlar ve vatandaşsız şahıslarnı Qırımğa qanunsız barmaqtan saqındıra.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukraina Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
