Rusiye tarafından ilhaq etilgen Qırımda mahküm etilgen ukrain faaliyetçisi Volodımız Baluhnıñ advokatı Olga Dinze, imayesi altında bulunğanğa, anasında bir sıra sürekli hastaqlar olğanı sebebinden yarımadada qalmaq muim, dep iddia ete.
Bunı qorçalayıcı Qırım.Aqiqat içün bergen intervyüde, Baluhnıñ deñiştirilmesine şanslar barmı ve o, afu etilmesini soracaqmı, suallerine cevap bergende dedi.
Dinze: «Baluh içün Qırımda qalmaq pek muim. Çünki anda onıñ anası yaşay. Onıñ sağlıq vaziyeti stabil degil, bir sıra sürekli hastalıqları bar, o daimiy baqımğa muhtac. Anası Qırımnı terk etmek istemey, çünki olar anda doğdı, bütün ömürleri anda keçti. Olar içün bu, ayatnıñ pek murekkep basamağıdır. Bu sebepten, mence, deñiştirüv aqqında mesele muzakere etilecek, lâkin Baluhnıñ özüniñ bu qararnı alacağına ve Qırım territoriyasından ketecegine emin degilim», – dedi.
O, imayesi altında olğanı ile bu meselelerni muzakere etmegenini ilâve etti.
Dinze: «İhtimal ki, biz birinci cinaiy iş boyunca muddetten evel azat etilmesine dair muracaat etecekmiz, çünki muddeti endi yaqınlaştı. Ve uküm artıq çıqarılğan soñ, eger o, qabaatlayıcı olsa, biz bu meselelerni muzakere etecekmiz», – dep, añlattı.
Baluh, mart 19-da ilân etken muddetsiz açlıqnı tutmağa devam ete.
Mart 14-te Kremlniñ kontroli altında olğan Qırım Yuqarı mahkemesi ukrain faaliyetçisi Volodımır Baluhqa dair qararnı deñiştirdi. Akem qabaatlavdan arbiy yedeklerniñ satın alınması aqqında maddeni alıp taşladı. Faaliyetçige qarşı koloniya-qasabada 3 yıl ve 5 ay muddetine azatlıqtan marum etüv ve, ondan ğayrı, 10 biñ ruble (qararnen 4,6 biñ hrn.) miqdarında cöreme şeklinde uküm çıqarılğan edi.
Mart 28-de Ukraina Tış işleri nazirligi Baluhnıñ deral azat etilmesini talap etti. Ukraina ombudsmeni Lüdmila Denisova, açlıq tutqan faaliyetçige ekimlerni yibermek ricasınen Rusiyedeki zenaatdaşına muracaat etti.
Aprel 2-de mahkeme UPTs KP (Kyiv Patriarhatınıñ Ukraina Ortodoks Kilsesi) arhiyepiskopı Klimentke Baluhnıñ cemiyet qorçalayıcısı olmağa izin berdi.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, o, Ukraina vatanperveri olğanı içün – eviniñ azbarında Ukraina bayrağı olğanı içün repressiyalar qurbanı olğanını iddia eteler.
