Esas qanundaki Qırım Muhtar Cumhuriyeti qısmı içün deñişmeler ve ilâveler işlep çıqqan Ukraina Anayasa komissiyasınıñ iş gruppası, teklif etilgen deñişmelerniñ metnini taqdim etti ve vesiqanıñ muzakerelerine keçti. Bunı Qırım.Aqiqatqa Qırımtatar Milliy Meclisi reisiniñ mesleatçısı Arsen Jumadilov bildirdi.
Jumadilov: «İş gruppası muzakere ve bazı meseleler boyunca rey bermek içün aprel 18-de toplanacaq. Ondan ğayrı, qırımtatar halqınıñ statusı aqqında qanun leyhası ve azırlanğan deñişmelerniñ metnine uyması kerek olğan bazı diger qanun leyhalarınıñ işlep bitirilmesi içün ekspertlerniñ alt gruppası meydanğa ketirildi», – dep tafsilâtlarnı añlattı.
Keçken sene Anayasa komissiyasınıñ iş gruppası, deokkupatsiyadan soñ Qırımnıñ statusına dair Ukraina Anayasası içün tüzetmeler işlep çıqmağa başladı. Deñişmeler, yarımadanıñ tamır halqı – qırımtatarlarnıñ öz Vatanında Ukraina devletiniñ sıñırları içinde öz taqdirini özü tayin etme aqqı közde tutulıp, azırlandılar.
Anayasa komissiyasınıñ iş gruppası Ukraina Anayasasınıñ Qırım Muhtar Cumhuriyeti aqqında onuncı bölügi içün deñişmelerniñ azırlanmasını artıq 2017 senesiniñ noyabrinde bitirgen edi.
