Ukraina Suv problemleri ve melioratsiya institutı mudiriniñ muavini Mihail Yatsük, ilhaq etilgen Qırımda er yıl yalıñız suv yetmezligi degil de, suv ile temin etüv boyunca fevqulâde vaziyet peyda olacaq, dep tüşüne. Bu fikirni o, aprel 5-te Qırım.Aqiqat Radio efirinde bildirdi.
Alim: «Fevqulâde vaziyet endi er yıl olacaq, 2018 senesinde de. Qırımnı suvnen temin etüv meselesi çezilmedi ve Şimaliy Qırım kanalı çalışıp başlamağance çezilip olamaz. Yeterli sayıda tatlılaştıruv stantsialarnı qurmağa çare yoq: bu paalı ve etraftaki muit içün havflıdır. Bizim tahminler ve esaplarımızğa köre, Qırımnıñ qoşumça ihtiyaclarını temin etmek içün Kubanda yeterli kölemde suv yoq. Anda öz defitsiti bar», – dep qayd etti.
Daa evel Rusiye Fevqulâde vaziyetler nazirligi yanındaki «Antistihiya» Umumrusiye fevqulâde vaziyetlerni monitoring ve tahmin etüv merkezi, 2018 senesinde Qırımda, şu cümleden saylaşqan suv anbarları sebebinden içilecek suvnıñ yetmezligi is etilmek mumkün, dep bildirdi.
Yanvarniñ soñunda Rusiyege tabi olğan Qırımnıñ Suv iqtisadiyatı ve melioratsiya boyunca devlet komitetinde, yarımadağa suv berilmesi tolu derecede temin etildi, tabiiy aqışlı anbarlarnıñ toluv derecesi ise 65%-den ziyadedir, dep esabat berdiler. Bu suv yedekleri Aqmescit, Aluşta, Yalta ve etraflarındaki köyler içün iyünge qadar yetecek, dep tahmin etile edi.
