QMC prokuraturası ilhaq etilgen Qırımda kütleviy harakterge malik olğan ukrain ve qırımtatar faaliyetçileriniñ taqip etilüvi vaqialarını maksimal şekilde vesiqalaştıruv üzerinde çalışa. Bunı Qırım.Aqiqat Radiosı efirinde muessisedeki cinaiy işniñ alıp barılması boyunca nezaret idaresiniñ rehberi İgor Ponoçovnıy bildirdi.
Onıñ aytqanına köre, yarımadada qırımtatarlarğa, ukrainlerge, diger milletlerge ait vatandaşlarğa tazyiqnıñ, diniy alâmet boyunca, siyasiy baqışlarğa köre tazyiqnıñ bütün vaqiaları, cinaiy işler alıp barılmalarınıñ başlatılmasında aks etile ve daa soñra olar Halqara cinaiy mahkemede baqılacaqlar.
QMC Prokuraturasınıñ vekili: «İşimizniñ esas yönelişlerinden biri – Qırımda vatandaşlarnı qorçalav. Teessüf ki, olarnı Qırım territoriyasında işğalci ukümetiniñ areketlerinden vastasız şekilde qorçalap olamaymız. Lâkin biz, daa soñra bu şahıslarnı cinaiy mesuliyetke çekmek mumkün olsun dep, bütün bu vaqialarnı maksimal şekilde vesiqalaştırmağa tırışamız», – dedi.
Muessisedeki cinaiy işniñ alıp barılması boyunca nezaret idaresiniñ rehberi İgor Ponoçovnıyden alınğan intervyüniñ tolu şeklini Qırım.Aqiqat saytında oquñız.
İlhaqtan soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.
