Kremlniñ kontroli altında olğan Qırım Yuqarı mahkemesi ukrain faaliyetçisi Volodımır Baluhqa tevqifniñ uzatılmasına qarşı şikâyetniñ baqılmasını aprel 5-ke keçirdi.
Qırım aq-uquq qorçalayıcıları gruppasınıñ bildirgenine köre, mart 19-dan başlap başqa işi boyunca çıqarılğan mahkeme qararına qarşı narazılıq kösterip açlıq tutqan Baluhnı Aqmescitke ketirmediler, çünki o Aqşeyhteki (Razdolnoyedeki) muvaqqat tutuluv izolâtorında buluna.
Baluh oturışuvda videoalâqa vastasınen iştirak etti. Aynı zamanda o, qolları buğavlanğan alda buluna edi. Qorçalavı buña narazılıq bildirdi, çünki buña qabaatsızlıq prezumptsiyasınıñ bozuluvı olaraq qıymet kesmek mumkün. Bundan soñ faaliyetçiniñ qollarından buğavlar alıp taşlandı.
Aq-uquq qorçalayıcıları, Baluhnıñ qorçalavğa aqqı bozuldı, çünki o, videoalâqa boyunca «advakatı ile tolu şekilde aqıl tanışıp olamay edi», dep qayd ettiler.
Bu munasebet ile oturışuvnı 2018 senesi aprel 5-ke qadar toqtatmağa qarar berildi. Qorçalayıcı Baluhnen körüşmek içün ketti.
2017 senesiniñ ağustosında Qırımda mahküm etilgen ukrain faaliyetçisi Volodımır Baluhqa qarşı daa bir cinaiy iş açıldı. Bu, Baluh ve onıñ advokatı tarafından ukrainni aqaretlegen ve urğan Aqşeyhteki muvaqqat tutuluv izolâtorınıñ rehberi Valeriy Tkaçenkoğa qarşı poliske şikâyet berilgen soñ oldı. Buña cevaben Tkaçenko ukrainge qarşı öz şikâyetini berdi. Ukrainniñ qorçalavı bergen malümatqa köre, Tkaçenko özü ukrainge ucüm etti: urdı, küfür sözlerini qullanıp sögdi, milliy alâmeti boyunca aşalay edi.
Mart 19-da Kremlniñ kontroli altında olğan Aqşeyh rayon mahkemesi Volodımır Baluhqa 2018 senesi iyün 19-ğa qadar tevqif etilgen alda bulunuv şeklinde azatlıqnı sıñırlav tedbirini sayladı.
Baluh, mart 19-da ilân etken muddetsiz açlıqnı tutmağa devam ete.
Mart 14-te Kremlniñ kontroli altında olğan Qırım Yuqarı mahkemesi ukrain faaliyetçisi Volodımır Baluhqa dair qararnı deñiştirdi. Akem qabaatlavdan arbiy yedeklerniñ satın alınması aqqında maddeni alıp taşladı. Faaliyetçige qarşı koloniya-qasabada 3 yıl ve 5 ay muddetine azatlıqtan marum etüv ve, ondan ğayrı, 10 biñ ruble (qararnen 4,6 biñ hrn.) miqdarında cöreme şeklinde uküm çıqarılğan edi.
Mart 28-de Ukraina Tış işleri nazirligi Baluhnıñ deral azat etilmesini talap etti. Ukraina ombudsmeni Lüdmila Denisova, açlıq tutqan faaliyetçige ekimlerni yibermek ricasınen Rusiyedeki zenaatdaşına muracaat etti.
Aprel 2-de mahkeme UPTs KP (Kyiv Patriarhatınıñ Ukraina Ortodoks Kilsesi) arhiyepiskopı Klimentke Baluhnıñ cemiyet qorçalayıcısı olmağa izin berdi.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, o, Ukraina vatanperveri olğanı içün – eviniñ azbarında Ukraina bayrağı olğanı içün repressiyalar qurbanı olğanını iddia eteler.
