Kyivdeki Obolonskiy rayon mahkemesiniñ sabıq Ukraina prezidenti Viktor Yanukoviçniñ işi boyunca oturışuvında Ukraina silâlı quvetleriniñ (USQ) sabıq Baş ştabı rehberi Yuriy İlyinni Qırımdan videoalâqa vastasınen sorğulamaqnı planlaştıralar. Bunı Ukrainanıñ kütleviy haber vastaları bildire.
KHVlerniñ malümatına köre, oturışuv aprel 18-ne planlaştırıldı.
Azatlıq Radiosınıñ bildirgenine köre, mahkeme Yanukoviçke qarşı işniñ baqılmasını aprel 5-ke avuştırdı. Nevbetteki oturışuvlar aprel 11-12 ve 18-19-ğa tayin etildi.
Daa evel, aprel 4 oturışuvında mahkeme qorçalav tarafınıñ şaatı Valeriy Lugovskiyniñ sorğulanmasını başladı, dep bildirilgen edi. Oturışuv esnasında o, 2014 senesiniñ fevralinde Mariinskiy parkındaki «Stop Maydan» tedbiriniñ iştirakçisi olğanını bildirdi.
2017 senesi iyünniñ soñunda Obolonskiy rayon mahkemesi, sabıq Ukraina prezidenti Viktor Yanukoviçniñ devletke hainlikte qabaatlavı boyunca işniñ ğiyabiy şekilde baqılmasına keçti.
Mahkeme tarafından baqılğan işte, tahqiqat Yanukoviçni Ukraina Cinaiy kodeksiniñ üç maddesi boyunca qabaatlay: 27-nci maddeniñ 5-nci qısmı (devletke hainlik), 437-nci maddeniñ 2-nci qısmı (tecavuzkâr cenkniñ alıp barılmasına qol tutuv) ve 110-ncı maddeniñ 3-nci qısmı (insanlarnıñ elâk etilmesine ya da diger ağır neticelerge ketirgen Ukrainanıñ topraq bütünligi ve toqunılmazlığına qarşı qast etilmesine qol tutuv).
Meydandaki qurşunğa tutuvlardan soñ Rusiyege qaçqan sabıq Ukraina prezidenti qabaatlavlarını inkâr ete.
