Link açıqlığı

Saatnıñ esas haberi

Qırımda «Fevral 26 işi» boyunca oturışuv başqa künge avuştırıldı


Kremlniñ kontroli altında olğan Aqmescitteki Merkeziy rayon mahkemesi muhakeme etilgenlerden birisiniñ hastalığı sebebinden «Fevral 26 işi» boyunca oturışuvnı başqa künge avuştırdı. Bunı Qırım.Aqiqat muhbiri bildire.

Akem Sergey Demenok tedaviylev muessiseniñ cevabını oqudı. Oña köre, ambulatoriya tedaviylevi 14 künni teşkil etecek.

Nevbetteki oturışuv aprel 12-ge planlaştırıldı.

Martnıñ soñunda Kremlniñ kontroli altında olğan Qırım Yuqarı mahkemesi «Fevral 26 işi» figurantları Ali Asanov ve Mustafa Degermencini mayıs 7-ge qadar ev apisinde qaldırdı.

2015 senesinde, Qırım Yuqarı Radası binasınıñ divarları yanında 2014 senesi fevral 26-da Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir grup qırımtatar faaliyetçilerine qarşı mahkeme başlandı. Olar kütleviy qarışıqlıqlarda iştirak etkenlerinde qabaatlanalar.

Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.

2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.

XS
SM
MD
LG