Mart 28-de Moskva şeer mahkemesi Tverskoy rayon mahkemesiniñ qararını quvette qaldırdı. Daa evel Tverskoy rayon mahkemesi Qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ Rusiye prezidenti memuriyetine qarşı dava açuv boyunca arizalarınıñ qabul etilmesini red etti. Bunı mart 29-da Qırım.Aqiqatqa Rusiye advokatı Nikolay Polozov bildirdi.
Polozov: «Tünevin (mart 28-de – QA) kerçekten de mahkeme oturışuvı olıp keçti. Em de sadeleştirilgen şekilde, taraflar davet etilmeden. Olar, Ahtem Çiygoz ve İlmi Umerov tarafından Rusiye prezidenti memuriyetine qarşı davalarnıñ qabul etilmesini ve bu şikâyetlerni qanaatlendirüvniñ red etilmesi boyunca Tverskoy mahkemesiniñ eki ukmüni quvette qaldıruv aqqında qarar çıqardılar», – dedi.
Onıñ aytqanına köre, böyle qarar qanunsızdır.
Advokat: «Menim fikrimce, bu tam bir adliy sandıraqlama. Tverskoy rayon mahkemesiniñ akemi özüniñ qararında, prezident memuriyetiniñ hadimlerine mahkeme taqibinden immunitet kenişletile, dep işaret etti. Rusiye Anayasasınıñ 24-nci maddesi bozuldı. Muayen şahıslarnıñ aqları ve urriyetlerine dair devlet aktları tanışmaq içün taqdim etilmek kerekler. Bu yerde prezident memuriyetiniñ imaye altına alınması aqqında söz yürsetile. Bu, Rusiye akemleriniñ akimiyetke tolusınen tabi olğanlarını isbatlay», – dedi.
Polozov, Moskva mahkemesiniñ qararına qarşı «endi İnsan aqları boyunca Avropa mahkemesine şikâyet berilecek», dep ilâve etti.
Daa evel Polozov, Moskvadaki Tverskoy rayon mahkemesi tarafından Qırımtatar Milliy Meclisi reisleri Ahtem Çiygoz ve İlmi Umerovnıñ davalarını baqmaq içün qabul etmegenine qarşı şikâyet berdi. Ayrıca, Çiygoz ve Umerovnıñ Rusiye prezidenti memuriyetine qarşı afu etüvge dair malümatnıñ berilmesi boyunca davalarınıñ qabul etilmesini red etüv aqqında söz yürsetile.
Yanvar 26-da Moskvadaki Tverskoy rayon mahkemesi davalarnı red etti.
2017 senesiniñ sentâbrinde Kremlniñ kontroli altında olğan Qırım Yuqarı mahkemesi Ahtem Çiygoznı 8 yıl koloniyağa mahküm etti. 2015 senesinde Çiygoz, 2014 senesi fevral 26-da Qırım Yuqarı Radasınıñ binası ögünde Ukrainanıñ topraq bütünligine qol tutmaq içün ötkerilgen mitingde iştirak etkeni içün yaqalanğan edi. Onı, kütleviy qarışıqlıqlarnıñ teşkil etilmesinde qabaatlay ediler. Daa soñra Qırımdaki Rusiye mahkemesi İlmi Umerovnı eki yıl koloniya-qasabağa mahküm etti. Onı halq ögünde separatizmge davet etkeninde qabaatladılar. Oktâbr 25-te Rusiye ukümeti, Umerov ve Çiygoznı azat etip, Türkiyege teslim etti. Daa soñra azat etilgen Qırım Milliy Meclisiniñ liderleri Kyivge keldiler.
