Rusiye Qırımda Ukrainağa ait radio sıqlıqlarınıñ qullanıluvına yarış ilân etti, albuki bu, Halqara elektrik alâqa birligi nizamnamesiniñ bozuluvıdır. Bunı mart 27-de Kyivde Ukraina İnformatsion siyaset nazirliginiñ birinci muavini Emine Ceppar bildirdi.
Onıñ aytqanına köre, yarımadadaki Ukraina radio sıqlığı resursı Rusiyeniñ devlet ya da şahsiy KHVlerine berildi.
Emine Ceppar: «İşğalcilerniñ Qırımda birinci işi, Ukraina yayınlavınıñ kesilmesi ve tele ile radio signal üzerinde kontrolniñ alması oldı… Söz serbestliginiñ yoq etilmesinde ekinci adım, aralarında TRK, «Çernomorskaya» ve ATR kibi büyük teleradioşirketleri olğan Ukraina KHVleriniñ çalışa bilmelerini imkânsız yapma oldı. Cemi olaraq Ukrainanıñ 10 KHVsi onlarca jurnalistlernen beraber yarımadanı terk etmege mecbur oldı. Qırım muarririyetleriniñ bir qısmı qapatıldı. Bugün endi vatandaş jurnalistikası tazyıq ve repressiyalar altında buluna», – dep qayd etti.
Mart 27-de Kyivde, yañı sanktsialar cedveliniñ ilân etilmesi içün sebep ola bilecek ilhaq etilgen Qırımda Rusiye tarafından Ukrainanıñ radio sıqlığı resursınıñ zapt etilmesi aqqında esabat taqdim etildi. Esabatnı Televideniye ve radio yayınlav boyunca milliy şura ve Ukraina İnformatsion siyaset nazirligi azırladılar.
Milliy şuranıñ rehberi Yuriy Artemenko, esabatnıñ neşir etilmesine «Ukrainanıñ teleradioinformatsion saasını imaye etmek maqsadınen «ekinci cebhe»niñ açıluvı» dedi.
Milliy şura ve İnformatsion siyaset nazirliginiñ malümatına köre, Qırımnıñ Rusiye tarafından işğali neticesinde yarımadada 39 Ukraina radiostantsiyası ve 31 Ukraina telekanalı yayınlav imkânını bütünley ğayıp etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
