Rusiye advokatı Nikolay Polozov, mart 28-de Rusiyeniñ Moskvadaki mahkemesinde, Qırımtatar Milliy Meclisi rehberlerinden Ahmet Çiygoz ve İlmi Umerov tarafından berilgen şikâyetlerniñ baqılması boyunca mahkeme oturışuvlarınıñ ötkerilecegini bildirdi.
Onıñ aytqanına köre, oturışuvlarda, Çiygoz ve Umerovnıñ Moskvadaki Tverskoy rayon mahkemesiniñ qararına qarşı şikâyetleri baqılacaq. Olar Rusiye prezidentiniñ memuriyetine qarşı davalar açacaq edi, mahkeme bu davalarnı red etti.
O, «Veciye Kaşka işi» tahqiqattan evelki teşkerüv seviyesinde buluna, kompleksli adliy-tıbbiy ekspertiza ötkerile, dep ilâve etti.
Nikolay Polozov, Moskvadaki Tverskoy rayon mahkemesini, Qırımtatar Milliy Meclisi reislerinden Ahmet Çiygoz ve İlmi Umerov tarafından açılacaq olğan davalarnıñ red etilmesi aqqında qararına qarşı şikâyet berdi. Şu cümleden, mahkeme Çiygoz ve Umerovnıñ Rusiye prezidenti memuriyetine qarşı, cinayetlerini afu etüv fermanı aqqında malümatnıñ berilmesine dair davalarını red etti, dep bildirile.
Yanvar 26-da Moskvadaki Tverskoy rayon mahkemesi tarafından davalarnıñ red etilmesi aqqında belli oldı.
2017 senesiniñ sentâbrinde Kremlniñ kontroli altında olğan Qırım Yuqarı mahkemesi Ahtem Çiygoznı 8 yıl koloniyağa mahküm etti. 2015 senesinde Çiygoz, 2014 senesi fevral 26-da Qırım Yuqarı Radasınıñ binası ögünde Ukrainanıñ topraq bütünligine qol tutmaq içün ötkerilgen mitingde iştirak etkeni içün yaqalanğan edi. Onı, kütleviy qarışıqlıqlarnıñ teşkil etilmesinde qabaatlay ediler.
Daa soñra Qırımdaki Rusiye mahkemesi İlmi Umerovnı eki yıl koloniya-qasabağa mahküm etti. Onı halq ögünde separatizmge davet etkeninde qabaatladılar.
Oktâbr 25-te Rusiye ukümeti, Umerov ve Çiygoznı azat etip, Türkiyege teslim etti. Daa soñra azat etilgen Qırım Milliy Meclisiniñ liderleri Kyivge keldiler.
