Mart 26-da Kyivde, Rusiyeniñ Ukrainadaki elçiligi yanında, ilhaq etilgen yarımadada zorbalıq neticesinde ğayıp oluv qurbanlarına bağışlanğan «Aqqu gölü» Qırımda alıp qaçılğanlar aqqında ikâye etmez» perfomans-tedbir keçe.
Bildirilgenine köre, faaliyetçiler ve aq-uquq qorçalayıcıları Rusiye ukümetinden işlerniñ tahqiq etilmesini ve Qırımda ğayıp olğan Ukraina vatandaşlarınıñ tapılmasını talap eteler.
Qırım aq-uquq qorçalayıcıları gruppası, alıp qaçuvlarğa Rusiye ukümeti ya da onıñ kontroli altında olğan paramilitar gruppalarnıñ alâqası bar, dep tahmin ete.
Kremlniñ kontroli altında olğan Qırım ukümeti, de facto ğayıp oluv vaqialarını tanıy, lâkin olarğa özüniñ alâqası olğanını inkâr ete.
Faaliyetçilerniñ malümatına köre, Qırımnıñ Rusiye tarafından ilhaqından başlap, 44 Qırım sakini ğayıp oldı. 17 kişi tapıldı, 16-sı – ale daa habersiz ğayıp olğan sayıla, 6-sı – ölü tapıldı, daa ekisi – azatlıqtan marum etüv yerlerinde buluna.
