Qırımnıñ Qarasuvbazar rayonındaki Muşaş (Vişennoye) köyünde mart 24-ten 25-ke keçer gecesinde qırımtatar qorantasına çaypamaq maqsadınen silâlı ucüm yapıldı. Bunı Qırımtatar Milliy Meclisiniñ reisi Refat Çubarov bildirdi.
Onıñ bildirgenine köre, ucüm esnasında evde qadınlar ve çağına yetmegen balalar buluna edi.
«Aydutlar, para ve qıymetli şeylerini talap etip, qadınlarğa qarşı beden eziyetlevi qullandılar. Al-azırda zarar körgen büyükler hastahanede yerleştirildi, aqılğa sığmaz psihologik travmalar keçirgen balalarnen ise psihologlar çalışa», – denile bidirüvde.
Qurultaynıñ Merkeziy icra komiteti reisi Zair Smedlâyev özüniñ Facebookında adiseniñ yerinde çıqarılğan videonı derc etti. Onda ev, odalarda tar-mar etilgen eşyalar ve, videonı çıqarğannıñ aytqanına köre, ucüm etkenler tarafından qadınlar tutulğan yertölege kiriş kösterile.
Al-azırda Qırım uquqqoruyıcı organlarınıñ hadimleri tarafından adisege dair izaatlar berilmedi.
Qırım.Aqiqat adiseniñ tafsilâtlarını ögrenmege areket ete.
