Link açıqlığı

Saatnıñ esas haberi

Qırım MCniñ patrul polisi yarımada ile memuriy sıñırda telükesizlikni temin etecek – Gdanov


İlhaq etilgen Qırım ile memuriy sıñırda telükesizlikni temin etmek içün Herson vilâyetinde patrul polis hadimleri yetişmey. Bu, 2018 senesiniñ soñuna qadar Qırım Muhtar Cumhuriyetiniñ patrul polisini meydanğa ketirmek içün baş sebeplerden biridir.

Bunı, «Gromadske radio» içün bergen izaatta Ukraina prezidentiniñ QMCdeki temsilcisiniñ muavini İzet Gdanov bildirdi.

Gdanov: «Qırımnıñ ilhaqından evel Herson vilâyetinde olğan polislerniñ sayısı deñişmeyip, aynı seviyede qaldı. Anda, şekillengen vaziyetni nezaret altında tutmaq içün yeterli miqdarda polis küçü yoq. Üç keçirüv noqtasınıñ er birinden vatandaşlarımız keçe. Çoñğar köyündeki keçirüv noqtasından yalıñız bir tarafqa er ay 44 biñgece kişi keçe», – dep añlattı.

Onıñ aytqanına köre, qomşu Rusiye tarafından toqtamayıp, qıtadaki Ukrainada vaziyetni stabilsiz alğa ketirmek teşebbüsleri yapıla.

Ukraina prezidentiniñ QMCdeki temsilcisiniñ muavini: «Biz Ukrainanıñ qıtadaki qısmında bütün strukturalarnı öyle bir teşkil etmek kerekmiz ki, Qırım Muhtar Cumhuriyeti azat etilgen soñ bu qısımlar anda avuştırılsın», – dedi.

Ukraina İçki işler nazirliginiñ Qırım Muhtar Cumhuriyetindeki Baş idaresi 2015 senesinde ğayrıdan meydanğa ketirilip, Odessada çalışıp başladı. Milliy polisniñ Qırım Muhtar Cumhuriyeti ve Aqyardaki Baş idaresiniñ rehberi vazifesine Anatoliy Bahçivanci tayin etildi.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».

XS
SM
MD
LG