Link açıqlığı

Saatnıñ esas haberi

Qırım MC polis qısımlarınıñ tekmillenmesi yılnıñ soñuna qadar yekünlenecek – Milliy polis


Ukraina Milliy polisi başlığınıñ birinci muavini Vâçeslav Abroskin QMCde Ukraina prezidentiniñ daimiy vekiliniñ birinci muavini İzet Gdanov ile körüşüvi esnasında, 2018 senesi mart 24 künü
Ukraina Milliy polisi başlığınıñ birinci muavini Vâçeslav Abroskin QMCde Ukraina prezidentiniñ daimiy vekiliniñ birinci muavini İzet Gdanov ile körüşüvi esnasında, 2018 senesi mart 24 künü

Qırım MC polisi qısımlarınıñ tekmillenmesi bu yılnıñ soñuna qadar yekünlenecek.

Bunı Ukraina Milliy polisiniñ matbuat hizmeti, nezaret etici muessise başlığınıñ birinci muavini Vâçeslav Abroskinniñ Qırım Muhtar Cumhuriyetinde Ukraina prezidentiniñ daimiy vekiliniñ birinci muavini İzet Gdanov ile körüşüviniñ neticeleri esasında bildirdi.

Matbuat hizmeti, Vâçeslav Abroskinniñ sözlerini naqil etip: «Al-azırda Qırım polisiniñ strukturasındaki qısımlarnı tekmillev ceryanı devam ete. Yılnıñ soñuna qadar olarnıñ, şu cümleden Qırım patrul polisindeki bir qısmınıñ tekmillenmesi yekünlenecek. Polis qısımlarınıñ tekmillenmesi çeşit uquq bozuvlarğa ve, onadan ğayrı, Rusiyeniñ mahsus hizmetleri tarafından Ukrainanıñ qıtadaki qısmına yollanılğan küçlerniñ faaliyetine effektiv şekilde qarşılıq köstermege imkân berecek», – dep bildire.

Bildirüvde, Ukraina Milliy polisiniñ, «Ukrainağa işğal etilgen topraqlarını qaytarmaq ve devlet territoriyasına cinayetler ve diversiyalar yapmağa azır olğan adamlarnıñ kirmesine yol bermemek» içün yapılğan faaliyette prezidentniñ Qırım Muhtar Cumhuriyetindeki temsilciligine er taraflama yardım etmege azır olğanı qayd etile.

Ondan ğayrı, körüşüvde ilhaq etilgen Qırım ile memuriy sıñırdan yolcularnıñ ve qaçaq yüklerniñ qanunsız taşılmasını toqtatuv aqqında söz yürsetildi.

Noyabr 21-de Ukraina Milliy polisiniñ rehberleri ile QMC ve Aqyar prokuraturasınıñ rehberleri Qırım boyunca bütün işleriniñ ğayrıdan yüklenmesini muzakere ettiler.

Ukraina İçki işler nazirliginiñ Qırım Muhtar Cumhuriyetindeki Baş idaresi 2015 senesinde ğayrıdan meydanğa ketirilip, Odessada çalışıp başladı. Milliy polisniñ Qırım Muhtar Cumhuriyeti ve Aqyardaki Baş idaresiniñ rehberi vazifesine Anatoliy Bahçivanci tayin etildi.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».

XS
SM
MD
LG