İlhaq etilgen Qırımda «Veciye Kaşka işi» boyunca «şaat»larından biriniñ aqrabası, 68 yaşlı Lilâ Gaziyeva-Ganiyevanı Rusiyeniñ kontroli altında olğan Ekstremizmge qarşılıq kösterüv merkezine sorğuğa çağırdılar.
Bunı mart 24-te Facebookta qırımtatar faaliyetçisi Lenora Dülber bildirdi.
Onıñ bildirgenine köre, Gaziyeva-Ganiyeva, Rusiyeniñ telükesizlik hadimleri tarafından «Veciye Kaşka işi» boyunca «şaat» sayılğan Yuriy Baranovnıñ aqrabası ola.
Faaliyetçiniñ bildirgenine köre, esli başlı qadın Qırımdaki Rusiye uquqqoruyıcı organına, Baranovda yapılğan tintüv vaqtında musadere etilgen tehnikanıñ qaytarılması içün muracaat etti.
Dülber: «Tahqiqatçı, fırsattan faydalanıp, 68 yaşlı qadınğa sualler berdi ve protokol tizip başladı. Onıñ yanında, yol-yoruq ögretecek ya da, iç olmadı, tahqiqatçınıñ yazğanlarını oquycaq kimse yoq edi», – yazıp, qadınnıñ közlüksiz olğanını ve tahqiqatçınıñ vesiqalarını imzalamaqtan vazgeçkenini qayd etti.
Rusiye telükesizlik muessiseler tarafından açıq menbalarda bu hususta izaat berilmedi.
2017 senesi noyabrniñ 23-nde Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri olarnı yaqalağanda qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Mart 14-te Kremlniñ kontroli altında olğan Aqmescitteki Kyiv rayonı mahkemesi «Veciye Kaşka işi» figurantlarınıñ tevqif muddetini eki ayğa uzattı.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
