Ukraina Telükesizlik hizmetiniñ (SBU) hadimleri Qırım ile memuriy sıñırdaki «Kolonçak» keçirüv noqtasında Ukraina Arbiy deñiz quvetleriniñ (ADQ) sabıq miçmanını yaqaladılar. Bunı mart 22-de SBUnıñ matbuat hizmeti bildire. Muessisede, qadınııñ askerlikten qaçuvda qabaatlanması boyunca qıdırılğanını bildirdiler.
Bildirüvde: «Uquqqoruyıcılar, Ukraina Silâlı quvetleri (USQ) terkibindeki Arbiy deñiz quvetleriniñ sabıq miçmanı olğan qadın 2014 senesinde Ukraina Mudafaa nazirligi ve USQ Baş ştabınıñ emrine binaen devletniñ qıtadaki qısmına qaytmadı. Arbiy prokuratura onıñ qıdırılğanını ilân etti», – denile.
Mahsus hizmetniñ operativ hadimleri, qadınnıñ, vesiqalarını ğayrıdan yapmaq maqsadınen Qırımdan çıqacaq olğanı aqqında malümat aldılar; onı, memuriy sıñırnı keçkende yaqaladılar, dep bildirile.
Ukraina Cinaiy kodeksiniñ 358-nci maddesiniñ 1-nci qısmı boyunca cinaiy ceryan başlatıldı. Tahqiqat areketleri devam ete, dep qayd ettiler muessisede.
Yaqalanğan qadınnıñ adı bildirilmey. Sabıq miçman tarafından askerlikten qaçuvqa dair şübheler boyunca izaat berilmedi.
Fevral ayında Kyivdeki mahkemeler Ukrainanıñ sabıq arbiyleri Maksim Odintsov ve Aleksandr Baranovnı apishanede bulunuv cezasını tayin ettiler. Olarnı, Qırımnıñ ilhaqından yapılğna devletke hainlikte qabaatladılar. Odintsovğa 14 yıl apishane muddeti berildi. Mahküm etilgenlerniñ advokatları mahkeme ukümine şikâyet bermek niyetindeler.
Mahkeme oturışuvı esnasında Baranov ve Odintsov olarğa isnat etilgen cinayetlerde qabaatlı olğanlarını tanımadılar.
